حكاية المطر
الكاتبه امل مهدي
البارت الاول
****************
نايمه متلفلفه بفراشي الدافي والمنبه
كل اشويه يدك
لمن طير النوم من عيني
رفعت راسي الغرفه بارده ثلج
اوي رجعت لفراشي
شنو هذا الشته مناوي يخلص والله
بيها نومه
لافه روحي بالغطه وادردم ويه روحي
اشلون بالامتحان هاي ست فضاء
شكد مكروهه هسه دأجلي
ايام الله شكد الا اليوم
واجاني صوت ماما
هدى_
ورف ولج ماما راح الوكت عليج اكعدي
ورف_
اي ماما كعدت
هدى_
يله بنتي الريوك حاضر
ورف_
بيه ما بيه كمت سحبت البرده
الشارع مبلل البارحه مطرت بليل
والانواء الجويه تكول اليوم هم مطر
كمت اغني
برد ورياح ومطر يتكتك
على الشباك
وموقد خشب يشتعل وكباله اني وياك....
يعيني... يعيني..... يعيني
فديتج فوفه على هاي النفسيه
ركضت للحمام
كافي اتاخرتي ولج فوفه
اغسل واحجي ويه نفسي
غسلت وفرشت اسناني
رجعت للغرفه بدلت ملابسي اني
رغم كسوله وانام هوايه بس
من اليل احضر شنو البس حتى أصبح ما انخبص
لبست بنطرون وفوكا تيشيرت طويل
يوصل اشويه فوك الركبه لان اخويه سلام يحاسبني وماما هم ما تقبل
تكول الستر احلى شي للبنيه
لبست قمصلتي وشالي وأخذت جنطي ونزلت
كعدت اتريك لكيت ماما متريكه وتريد تطلع ماما معلمه واختي مسره وياهه صف خامس ابتدائي
هدى_
ماما ورف اقفلي الباب من تطلعين والمفتاح خلي جوه السندانه
ورف_
مو سلام بالبيت
هدى_
سلام اخاف يظل نايم عاد من ارجع اني افتح الباب ما اظل ادك
ورف_ فهمت ماما
هدى_ يله اني رايحه
ورف _
مع السلامه ماما الله وياج
كملت ريوك وانتظر
شنو مو اتأخر ابو الخط واني اباوع للساعه
دك مبايلي
ورف_الو هلو شموسه
_ ورف اطلعي للجامعه اليوم الخط ما يجي عاطل
ورف_ لاااا يمعوده اشراح يمشيني للشارع
شمس_ اني اخويه راح ياخذني امر عليج
ورف_ لا حبيبتي شموسه اشكرج
روحي اني طالعه هسه
شمس_ يله كيفج
سديته الموبايل واني احجي ويه نفسي.... هي ياالله اروح وياهه
هي مره وتبت
على اساس اخوهه آدمي هو وعيونه لتبصبص
كمت لبست البوت وقفلت الباب وخليت المفتاح جوه السندانه
نص العراقين من يطلعون يحطون المفتاح جوه السندانه
معقوله الحراميه لهسه ما مكتشفين هذا المكان...!!!!
طلعت امشي لراس الشارع
منطقتنه امبلطه بس هم بيه حفر
و الدنيه ماطره
واني امشي سرعه واخاف يطفر عليه الماي
باوعت للسماء مغيمه وهوه قوي
يدفع بيه وبارده ثلج
شهر الواحد ٢٠١٦
الجو رمادي
أشرت للكوستر... وكفت وصعدت
مشت وكل شويه صاعد نازل وصوت السكن واني صافنه على الجامه اباوع العالم مستعجلين
كلهه تركض للدوام واليعنده معامله
ويخاف يتأخر يريد ايكون اول واحد على الشباك
مشت الكوستر وكل ما توكف اتوتر اخاف اتأخر على الامتحان مالتي
وكل اشويه اباوع للساعه البيدي
وصلنه نهايه الخط
نزلت واني شبه اركض اباوع الهوه يطير شكو ورقه او ذرات التراب
وتكفخ ابوجهي
شويه وكامت اتنكط امشي وابا ع
لقطرات المطر مو قطره كأنه مي وديرش عليه
لبست الكبوس مال القمصله
استغفر الله اليوم شكول عليج يا ست فضاء هسه الكل اجل امتحان الا هيه
تكول تطلبنه ثار مو طلاب عدهه
وصلت الكليه وركض على قاعتي
تلكتني شمس
شمس_
همزين وصلتي ظل بالي عليج
ورف_
يمعوده اكلت وحل علما وصلت
شمس_
مو كتلج تعاي ويايه
ورف_
اعذريني اخويه سلام ميقبل اصعد ويه احد والله
شمس_
وهو سلام اشمدري
ورف_
اشلون ترديني اكذب عليه
لا شموسه هذا مو خوش حجي
شمس_
مو تكذبين لا تكولين وفضت راحت
ورف_
ما أكدر سلام مو بس اخويه احسه ابويه هم
ابويه مات من وكت وسلام رغم عمره زغير بس اخذ مكان ابويه ويخاف علينه كلش
دخلت ست فضاء
كلنه سكوت
امتحنه الطلاب كلهم محد يحاجيه لان تخجلنه
عبالك طلاب ابتدائيه مو جامعه
كملت سلمت ورقة الامتحان طلعت
رحت للحديقه بلكت تطلع الشمس ندفه اشويه
شمس_
لج وينج ادور عليج ورف اهنا وين اروح يعني
شمس_
الجو ابد ما يشجع على الدوام
ورف_ لو مو الامتحان فلا اداوم
شمس_ اني ادخل محاضره واروح
مهند يجي ياخذني اخاف تمطر وآكله
ورف_
يله ندخل القاعه هناك ادفه
اليوم الشمس عده عطله
هههه
دخلنه محاضره ثانيه والثالثه
شمس _الو هلو مهند
مهند_ اني اباب الكليه
شمس_ انتظر ٥ دقايق تخلص المحاضره
مهند_ يله استعجلي
ما صدكنه خلص الاستاذ وطلعنه
شمس_
ما ناويه تجين ويايه
ورف _
لا ادخل اخر محاضره واطلع
يبين الجو بده يصحي
شمس_
كيفج اني رايحه ليعوفني
مهند اتاخرت عليه
باي فوفه
ورف_ بايات حبي
راحت شمس واني كعدت على المصطبه اريد اظبط هاي المحاظره لان باجر امتحان عندي
اكلب بالاوراق
يزن_ هلو ورف اشلونج
ورف_ هلو يزن اشو ماكو اصبح
يزن_ والله ابويه مريض جنت ويا بالمستشفى من البارحه
علما بدلني اخويه ورجعت للبيت بدلت مالحكت
ورف_ وشلون بالامتحان
يزن...... يمعوده شسوي خل اسوي
استاذه فضاء
ترسبني خليهه اني نصهن راسب بيهن المواد
ورف_ الله يساعدك
يزن_ تجين ناكل شي اني جوعان
ورف_ اي والله جوعانه
يزن_ شمس ماكو
ورف_ هسه راحت جانت امداومه مو اليوم على هذا الجو
حتي الخط ما اجانه
يزن_ هههههه غير كلهه تلتم
رحنه للكافتريا اني طلبت قطعه بتزا وهو هم
يزن_ اذا تردين اوصلج لا تستحين
اخوج اني
ورف_ تسلم يزن الله شاهد انت اخويه معتبرتك
بس هو الدرب عدل والكوسترات ظاله اشو
كمنه دخلنه المحاضره اني بالي كله
ويه الجو بدت تتجمع الغيوم اشويه اشويه
كملت المحاظره وطلعت
ورف_ شنو راجع للمستشفى
يزن_ اي والله نتبادل اني واخويه
ورف_ عنده العافيه انشالله
يزن_ الله يخليج مع السلامه
راح يزن من طريق واني مشيت سريع اباوع السماء صارت سوده
كأنه راح تمطر
امشي سريع والناس كلهه تركض وقت نهايه دوام العالم مسرعه بالمشي والسيارات هم سرعه تمشي
كأنه تريد تختفي من الشارع بكل سرعته
باوعت كوستر دتقبط
كمت مو امشي اركض حتى الحك بيه
مشت من بعد ما انترست بشر بين كاعدين وواكفين
أشرت بأيدي ما فاد
راحت لازم انتظر وصلت المظله مال وقوف اصير كونكريت
ومن صفحاته جام
وبيه مصاطب كونكريتيه يكعدون عليه الماره ينتظرون السيارات
رحت بالزاويه كعدت واباوع من
فاصل الجام
وهو المطر بده ينزل بصوره ما معقوله
ينهمر بقوه اباوع بدت الناس تختفي وتقل بالشارع وحتى السيارات على كثرته قلت
هاي اشلون مشكله ولا كوستر اجت
كله كيات وطريقهن مو علينه
دك تلفوني
هدى_ الو ماما ورف وين وصلتي
ورف_ ماماانتظر كوستر اصعد واجي
هدى_ وهذا المطر اجري تكسي
ورف_ ماما اخاف اجي بتكسي
لازم تجي كوستر لو يوكف المطر
هدى_ ماما ديري بالج على نفسج راح يظل بالي عليج
ورف_ لا لتخافين الدنيه نهار
سديته منه وكمت اكلب بمبايلي
كل اشويه اباوع وحدي بالموقف بس كيات تجي وتروح والمطر
مو طبيعي عبالك متحمله السمه
ودذبه كله على الكاع
امدنكه على موبايل وشلت راسي
ايهم.......
اجيت اركض اريد مكان احتمي بي من المطر اهدومي اتبللت وجهي شعري
احجي بصوت مسموع ما شفت احد بالموقف الدنيه شبه ظلمت من الغيم
وبالي كله ويه حالي التبهذل
نعلعلا شنو هذا الحظ الاغبر هسه
اني شطلعني مو جنت مطمور خرب
غيرتك ميسر
يعني ما اجيب السياره الا اليوم
انكت بهدومي من المي طلعت الموبايل
ادك..... يجيني الصوت رصيدك نفذ
لا يمكن أن تتصل
..... هاذا اشلون فكر حتى الرصيد خلص
ورف..... اني اسمعه وابتسم هذا كلهه ملتمه على راسه
ايهم ادردم وصاير أعصاب اطلع راسي المطر...
سبحانك ربي عبالك دوش ومفتوح
ظليت واكف ومتخوصر اشلون حيره
التفتت اريد اكعد
واتفاجا بنيه كاعده بالزاويه تباوع عليه وتبتسم
ورف من شفته التفت واتفاجا
ابوجودي بسرعه درت وجهي
ايهم رجعت ليوره وكعدت على المصطبه وافكر اخاف حجيت شي مو لائق اني متعود اغلط وافشر اذا
ويه اصدقائي
بس الحمد لله تذكرت بس سبيت ميسر الفيتر
اجتي كيه واثنين والبنيه كاعده
نسيت ميسر والسياره وتربعت هاي البنيه بعقلي
يعني ليش ما تصعد شمنتظره بهذا الجو
معقوله تنتظر احد
اي يجوز رجعت على موبايلي حتى ترميشه ما بي اشلون بله
اني طلعت على مود استلم سيارتي
هسه اشلون يجي وينطينياها
باوعت حتى المحلات بعيد حتى لو أخذها ركضه هم ما اكدر
اباوع للسماء سبحان الله يمكن راح انفيض على هذا المطر
التفتت عليها
ايهم....
اختي ممكن الموبايل اخابر بي
رصيدي خلص وعندي اتصال
مهم
ورف_ من حاجاني التفتت عليه وظليت محتاره لحظه اشلون انطي مبايلي
اخاف ياخذه وينهزم اني ما اعرفه
وكلشي يصير
وكأنه هو فهم لان شافني متردده
ايهم_ عادي اختي ما ريده
ورف_ خجلت من تصرفي كلتله
لا هاك خابر
ايهم_ لعد انت اكتبي خلي بيدج
ورف_
الصدك انحرجت منه
ردلي الرقم واني اتصلت
هاك
ايهم_ افتحي سبيكر احجي من يمي
ورف..... لا هاك..... وهلمره باوعتله بدون خوف شاب طويل يطلع بنهاية العشرين شكله حلو ومرتب
ايهم_ باوعتله بابتسامه اطمنه مايخالف
اذا فتح خط اخذه
ورف_ فتحت سبيكر عدت الاتصال مرتين ومحد رد
ايهم_ ها هيه اشكرج
سكتنه دقيقه والمطر مستمر
ايهم _ هاي مو كيات ليش ما تصعدين
ورف_ كوستر بس توصل منطقتنه
ايهم_ ها.. انت طالبه
ورف_ اي نعم... باوعت للساعه صارت ٣
ايهم_ نسيت احمد والسياره...
شغلت
كل تفكيري هاي البنيه اشكد حلوه
اني أكدر اصعد تكسي بس ما ردت اعوفه الا تصعد كدامي
وكفت اباوع المطر مستمر بقوه والشوارع بده يزيد المي بيها
وهيه بمكانه تباوع للشارع ابقلق
ما تحركت
اجو ٤ شباب يركظون وحتمو من المطر بالمظله
كعدو على المصطبه يتشاقون وصوتهم عالي والفاظهم سوقيه
وخصوصا من شافو بنيه ووحدها
يمهم
وكفت واخزر بيهم
احس صارت مسوليتي
دك موبايله....
ورف _ الو سلام تحاجي وتباوع من الجام واخيرا اجت كوستر
لا لا تجي هيانه الكوستر اجتي
سلام_ لعد تلكيني ابراس الشارع
جايب الشمسيه الج
ورف_ انشالله راح اصعد
يله الله وياك
وكفت الكوستر...
باوعت اتقدمت هيه اول وحده
وصعدت واشوف ذوله الاربعه
هم صعدو وصارو وراها بالظبط
بخانة الوره
ما كدرت ابقه واكف صعدت وراهم
وكعدت ابكرسي موازي للكرسي الكعدت بي
حتى اشوف اخاف يتحرشون بيها
ورف_ التفتت شفته صعد باوعت عليه يعني ما مبين عليه شي
معقوله هو هم جان منتظر الكوستر
شاب كلش مرتب ومبين مرتاح
ما عنده يصعد تكسي
أبين هاي أفكاري التفتت عليه
لكيته يباوعلي
درت وجهي على الجامعه المهم اوصل البيت
اني شعليه بي
مشت السياره وصارت مثل السفينه ناس واكفه وناس كاعده
الكل شارد من المطر
وذوله الشباب الاربعه الصعدو كعدو ورايه هرجو السياره بشقاهم
وضحكهم
واني من الصبح كاعده ومحاظرات دخت ما صدكت وصلت شارعنه
شفت سلام واكف والشمسيه بيده
رغم قل المطر
والركاب ماعندهم حديث غير أشكال المطر
وشصار من وره المطر
ورف _ عمو نازل
واحد صاح عدك نازل يابه
السايق_ اي عيني
وكفت الكوستر سوولي طريق ونزلت ونسيت الولد ظل بالكوستر نزل َما باوعت
ركض عليه سلام ودخلني جوه الشمسيه ومشينه اني ويا للبيت
ايهم_ طول ما هيه كاعده اراقب
كعد يمهه ولد ظل بالي مشغول اخاف يزعجه
الى ان كالت نازل يالله ارتاحيت
شفته نزلت
اني هم نزلت وراهه بس ما رحت وراهه عبرت على السايد الثاني
ركض عليه ولد ابهمه شايل شمسيه ودخلهه ويا ومشو بالشارع
راحت الكوستر وهمه اشويه ابتعدو باوعت المطر قليل بس بارده
عبرت ورحت وراهم
بس من بعيد اراقب
مشو بالشارع مسافه وبعدين دخلو ابفرع خامس بيت
الولد مد ايده فتح الباب ودخلو اثنينهم
من دخلو رحت باوعت على البيت
وطلعت على الشارع الثاني اخذت تكسي ورجعت البيتنه
لكيت سيارتي بالباب افتريت عليه
مصلحه
فتحت الباب واشوف ابويه
الاب_ انت مخبل ليش مترد
اشبي مبايلك
اخويه محمد _ شنو قصتك ايهم
ظل بالنه عليك
ايهم_ شنو جاهل وتخافو ن عليه
احجي وطلعت المبايل
اني اصلا خليته صامت من رديت الرقم للبنيه لان رديتله رقمي
حتى من ادك عليه رقمه يصير يمي
واحفظه
حركه دنيئه اعترف بس من شفته تيهت وخفت تصعد سياره واضيعه
بسرعه صارت ابالي هاي الفكره
طبعا اول مره اسويه
وحتى خجلان من نفسي بس فضول
اكلني جبرني اصرف هيج
منو جاب سيارتي
محمد_ الولد الفيتر ميسر خابرني وكال ادك عليه ما يرد
ايهم _ وهو شعرفه برقمك
محمد_ مو مصلح عنده ويعرفني
ايهم_ ها
صعدت غرفتي سبحت وبدلت وظليت كاعد اتخيل شكلهه ما ريده يروح من مخيلتي
لزمت دفتر الرسم والقلم الرصاص
وكمت ارسم على الورق ما خزنته
ذاكرتي ابتسامته عيونه المحتاره من طلبت منه الموبايل
نظرته للشارع
ساعه كلشي وثقته بلوحه اني تعجبت وكأنه ماخذله صوره
جسدت اربع نظرات لعيونهه
رغم حتى الجو كان رمادي بس
شفت بياض كفوفهه ولمعان خدودهه الوردي من البرد حتى ملابسه مثل ما هن رسمتهن
وخليت الرسمه كدامي وصافن بملامحه الجميله
يعني ماره عليه هواي بنات ما وحده
علقت بتفكيري ليش
هلكد شغلتني هاي البنيه
فززني
اخويه فقار.... ايهم تعال اتغده
ايهم اي والله كلش جوعان يله فقوري تعال ننزل
سحبت ايده لان ظل واكف يباوع
للرسمه
نزلنه
فقار_ هاي منو الراسمه حبيبتك
ايهم_ التفتت عليه شنو حبيبتك مو عيب تحجي حجي كبار
فقار _ تره اني بالسادس مو ازغير
عمري ١٢
ايهم_ ولو عمرك ١٢ بعدك ازغير
فقار _ منو هاي الرسمته
ايهم _ ما ادري مجرد لوحه
كعدت اتغديت لو يمكن انحسب عشه عليه
علياء ام ايهم _ هدومك كلهن رطبات
ايهم _ والله يوم هاي المطره كله
عليه صارت
علياء_ اوي سوده عليه أجر تكسي وتعال شبيك ماما
بعد عندي شغله رحتله وتاخرت
ونحصرت بالمطر
و تجيني العطسه
واعطس حيل.... اخ عبالي خشمي وكع
علياء_ هههههه سوده عليه فوت بالهول يم الصوبه
ايبين انشلت
ايهم_ عادي شنو عبالج احنه هناك كاعدين ببيوت
اشو مخلصيه بره لَمن نرجع
الا واحدنه مجفي على وجه
من التعب
علياء _ الله يسترك يوم ويحفظكم
ايهم _ أمين يوم
كملت اكل الحمد لله
رحت بالهول اسوالف اني وابويه
واخواني محمد
وفقار
رحمن ابو ايهم _ اشوكت
اداومون
ايهم _ بعد يومين
رحمن _ اداوم انت وصاحبك عمر سويه
ايهم _ اي يابه
رحمن _ الله يحفظكم انشالله
ايهم _ نعست كمت يله تصبحون على خير
كلهم اجمعين
صعدت الغرفتي واني على الدرج
صحت
يوم باجر ماريد احد يكعدني اريد اشبع نوم
علياء_ روح ارتاح يوم محد يكعدك
ايهم _ صعدت الدرج وعقلي كله يمهه
عبالك عمري كله ما شايف ابنيه
تمددت على السرير وخليت الرسم كدامي واباوعله
اذكرت ألموبايل بعده صامت
رحت جبته دورت على رقمه
حفظته باسم
طلعته بالكاشف الاسم (ورف)
ورف شنو هذا الاسم اول مره اسمع بي
رحت على الفايبر لكيت رقمه نازل عندي
ابتسمت وكأنه هيه أمامي واباعله
تمنيت لو أكدر اتصل بيه
بس لاخلي بس رقمه ابمبايلي
احس نفسه وياي حاليا هذا كافي
جنت كلش مصدع ونعسان
نمت نومه عميقه
ويمكن اخذت برد كعدت بليل سن يطك ابسن
شلت الموبايل خابرت...
ايهم _ الو محمد
محمد_ شكو شبيك
ايهم _ اني يمكن فلاونزه جيبلي غطه لازمتني بارده
محمد _ اي جايك وسده
جابلي بطانيتين ودثرني بيهن
محمد _ اوديك مستشفى
ايهم_ ماكو داعي باجر اروح
للصيدليه اخذ علاج اريد انام بس
محمد _ ماشي درت وجهي شفت
راسم شكل ابنيه كلش حلوه والاحلى الرسم اني ادري ايهم هوايته الرسم بس هيج مبدع ما
جنت اعرف
طلعت وسديت الباب
ثاني يوم للوحده يالله كعدت
اشويه زين بس راسي يوجعني
لازم اكوم احضر نفسي غراضي
اكوي ملابسي
مديت ايدي على الموبايل فتحته اباوع للرقم
كمت من فراشي غسلت ونزلت
ايهم_ صباح الخير
علياء _ هله بهلصباح اشلون صرت يوم
ايهم_
راسي راح ينفجر اريد جاي
علياء _ سويتلك شوربه حاره
اكل وانطيك الدوه
وورى الجاي يله يوم
ايهم_ اكلت وشربت دوه وصعدت الغرفتي سبحت وطلعت
رحت على عمر
أخذته ورحنه على كوفي نزلنه نراكيل وكهوه وكعدنه انسولف
عمر_ يا هله مو ادري بيك ما تصبر بدوني
ايهم _ اي ما اشوفني اجيتك واني مريض
عمر _ بس لا لاحتك المطره
ايهم _ ليش
عمر_ ولك ياهو اشوفه مريض
يابه شكو لاحني مطر
شنو القصه ليكول ما ماطره قبل
ايهم_ هسه لا ادوخني بيش الساعه نطلع
عمر _ ٥ أصبح هم يالله نوصل
كركوك
ماشي لعد خلي اكوم ما بقى وكت
عمر _ بعدهي ٩ شنو بعد وكت
ايهم_ اني شويه صداع عندي
اروح احظر غراضي
وانام
عمر _ بشرفك ابقه بعد وكت
ايهم..... لا والله اني راجع انت ابقه ابراحتك
عفته وطلعت من الكوفي
رجعت للبيت حظرت الجنطه وملابسي
ورتبت كل اموري
اشتغل واباوع على الصوره
اتخيله كاعده كدامي
نزلت يم نبع الحنان اتعشيت وكعدت اشويه ويه اهلي وصعدت
كمت الاحظ نفسي اشتاق للكعده بغرفتي كأنه شخص ينتظرني بيه
لزمت موبايلي وفتحته
فتحت فايبر
اباوع الرقمه نشط يعني عدهه نت
ظليت احوس شكتب
هيه لو تجاوب ويايه
لو حضر والله وياك عبوسي
كتبتله
شكرا لاجمل صدفه في حياتي
وصورت الرسمه الرسمته اله ودزيته
الموبايل بيدي واراقب
وصلت الرساله بس بعد ما شايفتهه
ظليت متوتر واباوع على الصفحه
ما كو رد
نعسان وراسي مصدع بعد البرد بيه آثاره
والموبايل بيدي وغفيت
استسلمت للنوم بتعب بعمق
ورغم كل هذا
فززني
الرجاج مال مبايل ونغمه الرسائل
بسرعه فتحت عيني
رسال منها
ورف..... منو...؟؟؟
تابع
**************
