اقتباس

تمهيد للأحداث

لا يا ماما أرجوكِ متدبحنيش.. متعمليش فيا كده .. هتدمر والله و هموت يا ماما هموت"

" تعالي أقعدي على رجل عمو يا حبيبتي ده أنا زي بابا..

تيجي نلعب لعبة سر ؟"

" بابا علشان خاطري صدقني دي مش أنا واللهِ اللي في الصور دي مش أنا .. بابا.. أنت مش بترد عليا ليه!. "

" ماما احضنيني.. الحياة طلعت قاسية أوي على بنتك الصغيرة"

" محدش بيحقق حلمه هنا يا صاحبي.. محدش بيحقق حلمه في بلده.. لأنه بلده بتدفنه هو و حلمه "

" يوجع القلب يا بابا يعني ابنك يا حاج يذاكر و يتخرج بامتياز في كل السنين دي و الآخر ميتعينش علشان ابن الغفير.. طب ما ابن الغفير و الوزير من التراب مخلوق!."

" لا متهزرش أنت كنت فاكر إنها ممكن توافق عليك.. يا ابني الله لا يسيئك بقا دي أبوها عنده شركة و أنت حي الله موظف فيها و إللي أنت بتقبضه في الشهر هي بتصرف ضعفه في الأسبوع.. شد لحافك على قد رجليك يا صاحبي "

" لا ماما أنا فعلاً كنت بحبه وعايزاه و أنتِ السبب إللي بعدتيني عنه بس أنتِ عارفه أنا مش مسمحاكي بسببك أنا بتعالج دلوقتي و بسببك أنا في دوامة مع واحد مريض نفسي هو اللي محتاج يتعالج مش أنا.. أنا الضحية هنا "

" أنا الضحية هنا بصولي أسمعوني طيب.. شوفوني لو لمرة أرجوكم أنا مش عروسة لعبة بتحركوها زي ما أنتوا عايزين كفايه بقا.. أنا تعبت "

" هي كانت أحلى حاجه في كل اللي عدى ده يا صاحبي.. أنا مش عايز أنساها..قلبي مش قادر خلاص أنا مش حابب غيرها ومش عارف أشوف غيرها "

" الحياة صعبة أوي على الكل بس عارفة مفيش حاجه مهونة الصعوبة دي غير وجودك.. تقريباً لولاكِ أنا مكنتش هقدر أتحمل كل ده لوحدي "

" أوعى تفتكر أن الرحلة فردية لا يا حبيبي أنا موجودة هنا أهو و لو مبقتش موجودة فأفضل فاكرني علشان متحسش إنك لوحدك "

" لا يا.... أنتِ أكتر من أختي عملتي كده إزاي..حرام عليكِ ده لو كنتِ طلبتي عيني مكنتش هتأخر والله.. ليه كده يا وجع قلبي عليكِ يا صحبتي "

" أحنا مختلفين يا .... زي السما والأرض.. فحاول إنك متتعلقش بيا يا حب علشان السما عالية أوي صعب تطولها "

" تصدق شكلك هتكسب الرهان يا اسمك إيه.. و مش بس الرهان شكله قلبي ضمن الحسبه كمان "

" عيب عليكِ مش قولتلك إني مش بخسر .. أنا كسبت بس المرادي كسبت حاجه أغلى من الرهان ده .. كسبتك أنتِ و مش هسمح إني أخسر معاكِ و هكسبك كل مرة "