البارت الاول … 🦅

تسلط الضوء من نافذة الغرفة على فتاة مبعثرة النوم كشعرها المنسدل على بشرتها الحنطية ... سحبت غطائها الذي يكاد يغطي جزء قليل منها واكملت نومها بالجانب المعاكس لوسادتها لم تمضي الا دقائق حتى تعالى صوت والِدتها المُنزعجة من صوت رنين هاتفها

: مسويه التنبيه حتى تكعدينا لو تكعديين

- تحركت يدها بحثا عن الهاتف المزعج لِتوقف صوته الذي يشبه صوت اخيها حين يغضب رمت بأحدا جوانب السرير واعتلت نظراتها سقف الغرفة تائها ببداية تجهل نهايتها ...

يا رب اذا بيها صالح خليها تصير

بعدت الغطى ونزلت من الجرباية امشي بخطوات مترددة اكمل نومتي لو اروح لمقابلة معروفة نهايتها قبل بدايتها … تنهدت بملل وطلعت غسلت وتوضيت صارت عيني على درج مديت راسي وصحت …حنين كعدت الكل خل يكعد سمعتوو

الام : راح اصعدلج

حنين: شخطت مشيتي للغرفة دخلت وسديت الباب ابدا اجهز نفسي ...

فتحت الكنتور وصفنت على ملابسي الحضرتهن بالليل عبارة عن بنطرون بيجي وقميص جوزي لبستهم وكفت يم المراية سديت ازرار القميص عدا اول دكمتين برزت لون البدي الاسود ، مسحت وجهي بطبقة خفيفة من واقي الشمس وثبته بالباودر رفعت المسكارة اطول أطراف الرموش يبرزن سحبة العين ختمت خطواتي بروج بني …صفنت بوجهي بالمراية وضحكت :

صدك ماعدهم ذوق اليرفضون هيج جمال

اخذت جنطتي و الملف ومشيت ناحية الباب قبل لا اطلع اللتفتت على المراية بنظرة اخيرة شمرت النفسي بوسه بالهواء ونزلت جوا ، باوعت بأرجاء البيت هدوء محد موجود مديت راسى بالمطبخ شفت امي صرت وراها وحجيت بترجي :

حنين: يمه عليج الله ادعيلي

الام: روحي يمه الله يهديج ويردلج عقلج

حنين:ضربت كصتي بخفة وضحكت:

لا يمه فهمتيني غلط اريدج تدعيلي انقبل اما ذيج الدعوة انسي تتحقق

الام: الله ايصبرني على ما بلاني

حنين:هو صوجي اكلج ادعيلي شو وخري خل اطلع

الام:اطلعين هيج

حنين: وصلت يم الباب وللتفتت عليها:

ليش شبيه!

الام: دنكي على رجلج وشوفي شلابسة

حنين:باوعت لرجلي وشهكت بصدمة لابسه (تكرمون) نعال بابا جنه سفينه غاركة بي رجلي ركضت جوا بدلته وطلعت سمعت ضحكات امي المستهزئة

الام: لا ها هيّ اطمنت قبلوج

حنين: اشكرج امي العزيزة على هاي ثقة

الام: ولج حنين مو كل مرة اعيد عليج الكلام سيطري على غضبج لا تخلين اللسانج ايضيع حقج

حنين: بتنهيدة

ادعيلي ما يستفزوني ساعتها مراح اضطر استخدم اللساني

الام: بعدي نظرج عنهم وردي بداخلج « أعوذ بالله من الشيطان الرجيم » ايزيل غضبج ويهدء اعصابج

حنين: إن شاء الله ، يلا سلام

طلعت وسدت الباب وراي مشيت مسافة عن بيتنا شفت صديقتي منتظرتني يم بيتهم بنفس منطقتنا سلمت عليها وطلعنا سوا للمقابلة وبداخلنا امل نتجاوز الاختبار على خير ...

اشرنا لاحد السيارات المارة كعدنا بالبداية ودرنا نظرنا انتابع الطريق بتركيز عبرنا نص المسافة لمحت اسم المدرسة المتوجهين الها وقفت السيارة ونزلنا نتمشى الها رفعت عيني على الاسم سميت بسم الله ودخلنا كبل للادارة ...

- السلام عليكم

-وعليكم السلام

عدكم مقابلة؟

نرجس: اي نعم

- خلو الفايل على مكتب وتفضلو انتظر

حنين:قدمنا وكعدنا ننتظر حضور باقي اللجنة

نرجس: برأيج ننقبل

حنين:هاي المقابلة رقم 9 بعدلي وحدة واحطم الرقم القياسي فاذا قبلوني او رفضوني بالحالتين كسبانه

نرجس: بطلي تفاهه لا احطم وجهج

حنين: شنستفاد من الجد غير الـ

قاطع حديثنا دخول زميله كانت تدرس ويانا اول مشافتنا اجت سلمت علينا ...

عبير: هاي بنات شعدكم هنا

حنين: نبيع طماطة

شنسوي يعني غير عدنا مقابلة

عبير: هاا اني هم اجيت اقدم ان شاء الله يختارون وحده من عدنا حتى تفتح جبسة البقية

نرجس: بستهزاء

اني اعرف منو الياخذوهاا ومستعدة ابصم بالعشرة

عبير: شقصدج

نرجس:تخلص المقابلة ونتشاوف ساعتها اكلج قصدي ويا دليل

عبير: ترا جايين مقابلة مو حلبة مصارعة

نرجس: ميحتاج نتصارع واحنا نعرف الفايز منو

عبير: اترخص منجن

حنين: اخذي راحتج

نرجس: ههه عبالها تعبر عليه

حنين: شكوو شبيج وياها

نرجس: يمعوده هاي ..

- نرجس فؤاد خل تجي لقاعة المقابلات و الباقي ينتظرون دورهم على اسماء

نرجس: حدخل مقابلة من اطلع افهمج الموضوع

حنين : اوك بالتوفيق

طلعت ملف العرض اراجع بين ما يوصل دوري مرت نص ساعة طلعت نرجس دخلت اني وراها مسكت مقبض الباب وردتت بخفوت «اللهم ادخلني مدخل صدق و اخرجني مخرج صدق و اجعلني من لدنك سلطانا نصيرا ربي اشرح لي صدري و يسر لي امري و احلل عقدة من لساني يفقه  قولي … » فتحت الباب صارو بوجهي اللجنة ابتسمت بهدوء وسلمت … السلام عليكم

-وعليكم السلام

تفضلي

حنين:خليت جنطتي والملف على الستول وبدأت اشرح ختمت شرحي بملاحظات توضيحية انفذهن في حال تم قبولي

-تمام ست حنين انتظري اتصال من عدنا خلال هاي اليومين نتصل بيج راح نفهمج على شروط عملنا والراتب وباقي الاجراءات ...

حنين: إن شاء الله

طلعت من اللجنة وبداخلي احساس هل مرة تمت على خير وراح اشتغل وياهم ، رحت بتجاه الادارة ماشفت نرجس طلعت برا هم ماكو اتصلت عليه ثواني وردت

نرجس: ها كملت مقابلتج

حنين: اي وينج

نرجس: بالحديقة تعاي

حنين: اوك جيت

سديت الخط وطلعت للحديقة شفتها كاعدة ومرسوم الحزن بملامحها رحت يمها وأردفت بضحك : يمكن العريس شرد

نرجس: ههههه اي

حنين: كعدت يمها ودغيتها بخفة

شبيج مبوزة

نرجس: قبلوج ؟

حنين: تقريبا اي كالو انتظري اتصال خلال هل يومين

نرجس:حبيبتي ذول طردوج بنزاكة حتى متضيع هيبتج وكشختج كلولج نتصل بيج

حنين:لا لو عرضي ما عجبهم كان كالو انتظري اتصال ما ايحددون مدة للاتصال والاتفاق على راتب و باقي الاجراءات

نرجس:كُل مسؤسسة الها اساليبها بالرفض حتى ما ايهبطون معنويات المتقدمين اما بالنسبة للمقبولين ايخلوهم يوقعون العقد فور انتهاء العرض

حنين: لا عندي احساس هل مرة انقبل حتى شوفي انطوني كارت التواصل

عبير : ياااي بنااات باركلي وقعت العقد

نرجس: اشكال البهلول

حنين: شوقعتي ! شقصدج بالعقد

عبير: شبيج مو دخلت وراج قدمت امام اللجنة نعجبو بأدائي كالو خل نتفق على الراتب اذا ايناسبج وقعي شفته كلش مناسب وقعت والشهر القادم اباشر

نرجس:

حنين: الف مبارك يعمري

عبير: الله ايبارك بيج يوم الالج

حنين: تسلمين

عبير: خطيبي منتظرني مع السلامة

- الله وياج

حنين:باوعت لنرجس صافنة على عبير الطلعت فرحانة وراحت صعدت بسيارة خطيبها تبشرة بقبولها :

كافي ركبتج انكسرت

ضربت رجلها بقهر وللتفتت عليه

نرجس:مو كتلج سالفة الاتصال طردة بنزاكة واصلا اول ماشفت عبير غسلت ايدي منهم مستحيل ايقبلونا

حنين: شقصدج !؟

نرجس: مسؤول اللجنة الابس قاط نيلي ايصير ابو خطيبها فكل عقلج يرفضها ويقبل وحده من عدنا

حنين: واسطة؟

نرجس:اايي لعدد السوواد عيونهاا شنوو نسيتي شلوون نجحتت مووو كلله غشش وهدااية للدكاترة وهسه نفس الشيي لان هذاا ابوو خطيبها قبلهاا

حنين:ما تحملت السمعتة شمررت الجنطة على نرجس ورجعت دخلت لقاعة المقابلة شفتهم كاعدين يتناقشون اول مشافوني سكتو ...

-نعم ست محتاجة شي

حنين: لا انتم المحتاجين

- عفوا !

حنين:اذا حضرتكم ما تسوون اعتبار للشهادة ولا للمعدل ولا الاداء شكو ناشرين اعلان ومخلينا نجي من الصباحيات ونخسر كراوي وطاقة تالي الشخص المقبول معروف قبل لا يجي

- هذا اسلوب بنت متعلمة

حنين: اباوع للحجة طلع ابو خطيب عبير

ضحكت بستهزاء وتابعت كلامي بهدوء :

اتعلم الاسلوب منك ساعة تحش براسي عن القيم واهداف نجاح المؤسسة تالي ترفضني الخاطر تقبل خطيبة ابنك هي هاي اهداف النجاح عندك

- طلعيي براا

حنين: راح اطلع لان ميشرفني اكون بمؤسسة تمشي بالرشاوي والمعارف وتهمل اصحاب المعرفة والشهادات بس العتب على الدولة االخلتنا نجيكم

عفتهم وطلعت رغم اعرف تصرفي غلط وينحسب عليه بس ما همني كد ما اني بردت كلبي

نرجس: اصخام الصخمني ولجج شسووويتيي تدرين ااذاا نشررو اسممج مراح تلكين مؤسسة تقبلج لج حتى كاميرات مخلين مفكرتي اينشروج ويفرون السالفة عليج

حنين: عندي اللسان وارد يلا خل نطلع حتى هواء هذا المكان مابي خير بسرعة يخلص

نرجس: اخبال اي والله

حنين: خل الدنيا كلها تدري عدا امي

نرجس: واضح تخافين دمشي كدامي

حنين: ههههههه احب اليفهمني

نرجس:اكو مدرسة جديدة قبل اسبوع فتحوها نشرو اعلان يردون كادر لجميع الاختصاصات

حنين: شخطت مشيتي بملل

مابيه حيل اتعارك اجليها لباجر

صارت كدامي ورفعت اصبعها بتحذير

نرجس: قسما بالله اذا فكيتي حلكج اله اكفخج كدامهم كافي فضايح مخليتي مستثمر ما تعاركتي ويا

حنين: نزلت اصبعها بنتر

ليش تحسسيني اتبطر عليهم متشوفين جشعهم واستغلالهم ترديني اسكت وآيد كلامهم ؟

نرجس: أمنت بالله صح استغلاليين واسلوبهم مستفز بس لا تخلين عقلج وياهم ماعجبج كلامهم استأذني وطلعي ، توقعي يجي يوم واحد منهم يصعد فد منصب بالوزارة لو حظج ايسويها ويطلع مدير بالمكان التتعينين بي ساعتها شنو موقفج وياا ؟

حنين: وين صايرة المدرسة

نرجس: ببتسامة

اي هيج اريدج تعاي

حنين: مشينا مسافة قليلة وصلنا لمدرسة بنائها حديث قبل لا ندخل استوقفنا احد الاشخاص هيئتة ادل على كونه احد عمال البناء … المدير موجود

: لا طلع للتربية يكمل اجراءات فتح المدرسة

حنين: توجهت انظاري لداخل المدرسة على امل المح احد الكوادر انتبه عليه وحجة بتساؤل

: لشنو اجيتو

حنين: شفنا الاعلان النشرو واجينا انقدم

:اهلا وسهلا

تفضلو جوا

حنين: دخل ودخلت ورا نرجس اما اني بقيت بمكاني ماكدر ادخل والمدرسة فارغة شعرفني بهذا شنو ومنو ايخلصنا اذا صار شي …اللتفتت عليّ نرجس واشرتلي بأيدها

نرجس: تعاي

حنين:هزيت راسي برفض

شعرفتي عنه ودخلتي ورا متشوفين المدرسة فارغة والمدير طالع للتربية واصلا هو شعلي

نرجس: يمكن الحارس بس بدون الزي الرسمي لان بعده ما بادي الدوام

حنين: سحبتها من ايدها

امشي نطلع لا اشمرج بهاي الخبطة

:تفضلو ستات ليش واكفات برا

نرجس: راح ادخل ياويلج اذا ما اجيتي وراي

حنين: استغفرت بهمس ودخلت وراها شفت باب المكتب مفتوح سميت بأسم الله ودخلت صار كدامي مترئس المكتب باوعتله بستغراب ابتسم وكال …

:آسف ماعرفتكم عني

اني استاذ خليل معاون سابق بمدرسة *** وحاليا المستثمر بهاي المؤسسة

حنين:اللتفتت لنرجس واعتلت ملامحي الصدمة

عمري ماحكمت على شخص بشكلة لو هندامة بس هل انسان ابد مو يم هل مستوى … رخت ملامحي وكعدنا مقابيلة

:اعرف انصدمتو من شكلي بس مثل متشوفون ملتهين بأعمال البناء لازم نكمل هل يومين حتى يجون ايوقعون على الكتاب النهائي

نرجس: ان شاء الله اتم الموافقة ويعلى اسم المؤسسة بين كل المدارس

:بفضل جهودكم اكيد

حنين: حمحمت بهدوء وتابعت كلامي

شوكت نقدم

:اذا وافقتو على بنود العقد اعتبرو نفسكم ويانا

نرجس: بحماس

بدون اختبار

حنين: شنو تضمن البنود

:لحظة

حنين: طلع فايل مليان اوراق سحب ثنين قدمهن النا

:اقرو وقررو

حنين:تجولت نظراتي على البنود اتنص على:

-يكون عدد ساعات العمل اليومي 6 ساعات اي من الـ 8 صباحاً لغاية الـ 2 ظهراً ويحق تمديد الوقت اذا دعت الحاجة لذلك …

- في حال ترك العمل دون تبليغ يدفع غرامة قدرها 5 مليون …

- يحق للطرف الاول فسخ العقد في اي وقت …

رفعت راسي للمستثمر بتساؤل … بنود العقد لا بأس بها لكن مامذكور عدد الحصص والخط على منو والراتب ؟

:الخط علينا لكن مسؤولية الطلبة تقع على عاتقج من اول يوم تستلمين خط كامل ياخذج قبلهم ويوصلج بعدهم في حال تعرض اي شخص الاذى انتِ المسؤولة ، اما الحصص تُقسم بوقت الدوام لكن مبدئيا نكدر نكول بين 20 - 25 حصة اسبوعيا

حنين: والراتب ؟

: 150 اذا ثبتي جدارتج السنة الخ يصعد 300

حنين: اداوم سنة كاملة تدريس + مسؤولة خط بـ150

: نعم اذا موافقة وقعي

حنين:اباوع لنرجس وقعت العقد وسلمتة اله دنكت على العقد تمنيت امزقة بوجهة على كم الاستغلال والجشع العاميهم … ابتسمت بتصنع وسلمت العقد فارغ

:معاجبتج البنود

حنين: خليني افكر وارجعلكم خبر

:براحتج ست

حنين: اخذت جنطتي وطلعت اجر ذيال الخيبه وراي

نرجس: ليش ما وقعتي

حنين: ماحب الاستغلال راتب شهر اطلعة على طالب خصوصي بالبيت

نرجس : يعني؟

حنين: اصبر لحد ما يبدا الدوام اذا ما لكيت المدرسة العادلة ابنودها افرغ غرفة اسويها قاعة تدريس واشتغل بالبيت

نرجس: براحتج بس ما تلكين هيج فرصة

حنين: الله كريم

رجعت للبيت اخبي حزني بفشل المقابلة واستغلال المستثمر ببتسامة مزيفة اكدر اخدع بيها المقابل اول ما دخلت لكيت امي كدامي تغسل بالطارمة ... هاي مامي كيفك

الام: اجت الخبلة مبين من الكيفك انرفضتي مو

حنين :شنو هل سمعة شنو ارفضتي منووو يرفض جوهرة ثمينة مثلي

لو تشوفين مدير الشغل اول مشافني كال ستوووب طردو كل المتقدمين لكيت لجنت ادور عليهاا

الام : يا الله يعني قبلوج؟

حنين: لا يوم جوارين المدير خبلة وضايعة من شافني عباله اني فطرد المتقدمين حتى ايوديني لبيتنا

شالت الصوندة وتقدمت عليه

الام: امشي ولي انت صدك مال نشمرج بالشماعية مو مال نورط الناس بيج

حنين:نبع الحنان متتحمل شقه بس خل افهمج

الام: روحي بنيتي بدلي ملابسج وتعاي للمطبخ اعلمج كم طبخة بلكي يجيج رجل و اقشمره بيج والله ايسامحني على هل فعله

حنين: نثرت شعري بغرور

هنياله الاصير نصيبه تلكين امه داعيتله بالمغرب هو بس اسمي حنين مليانه حنيه

هزت ايدهة بيأس ودخلت تكمل شغلها ...

صعدت الغرفتي بدلت ملابسي وكعدت اتصفح بالبرامج الى ان صار وقت الغدا ونزلت

الاب : ها بابا حنين شلون كانت مقابلتج

حنين: الحمدالله بابا بنتك مرفوضة

الاب : هاي مرفوضة وهيج فرحانة اذا تنقبلين شلون

حنين: هههههه لا عيب شنو انقبل

الاب: لكيتلج شغلة ورا الغدا نتناقش بيها

حنين : رديت بضحكة

اذا بيها فلوس زينة موافقة بدون نقاش

الاب: ليش هو اكو شغل ابلاش

حنين: كلشي ايصير

كملنا لغدا ورحت يم بابا اواجهة مصيري المخفي

الاب: بنيتي ابو يقين اتصل عليّ كال انو يقين لكت شغلة مفتشة مكانها وراتبها زين

حنين: مفتشة مال شنو؟

الاب: عتبات لو مراكز صحية يعني مكان مناسب الج

ثائر: حنين وينها وين هل شغلة عوفها متفيدها

الاب: ليش بويه مو ابو يقين يمدح بيهم ويكول بواسطة ياله كدرت اسجللها

ثائر :مدري القرار الك

الاب: خل اتصل بأبو يقين استفسر منه بعدها قررو

حنين: اتصل عليه وفتح مكبر صوت نستمع اله سلم عليه وبدا يسأل على نوع الشغل …

الاب : يعني وين مكانهم وشنو شغلها

ابو يقين:شغلة زينة وذاك من ذاك الينالة نصيب وياهم ، تكعد بمكان امن وي البنات وراتبها محترم

الاب: مجاوبتني يعني شنو شغلها بالضبط ومكانهم

ابو يقين: والله يا ابو ثائر المكان حسب المهارات ايقسموهن اما شغلهن مفتشة على الاغلب عتبات لو مستشفى من هل اماكن وردت بنتك وياها اقلها وحدة تنتبه للثانية

الاب :مشكور خوية ماقصرت

ابو يقين : مابينا شكر والله ايقدملهن البي خير

الاب: إن شاء الله ، اخذ راحتك

ابو يقين :في امان الله

الاب: في امان الله

ها بوية شكلتي

حنين: باوعت الاخواني سكتو محد اعترض اللتفتت الابوي بتردد … بكيفك بابا

الاب: ببتسامة

هاهيه باجر انروح حتى تملين استمارة التقديم

حنين: إن شاء الله

عفتهم وصعدت لغرفتي سديت الباب وسحبت فوني اتصلت على يقين  : هلا شلونج

يقين: هلا عمري

حنين: اكلج شنو سالفة الشغلة اشو مداخلة عقلي تفتيش وتدريب ومدري شنو … ضحكت وردت بحماس

يقين:لج شغلة كلش حلوه هنياله الينقبل بيها وبعدين هو صاحلج شغل حتى تفيكين ميدخل عقلج اشو يوميا رايحة لمقابلة وطارديج

حنين: خوش بسمار

يقين: هههههه الحقيقة مرة

حنين: هههههه اي

زين شنو نظامهم بالضبط

يقين: تفتيش

حنين: وين يعني

يقين: تعاي قدمي ومعليج بالباقي شغل كلش حلو

حنين: تمام

سديت الخط و بلشت اجهز نفسي لمقابلة باجر حضرت كل مستمسكاتي المطلوبة وملابسي وثاني يوم توجهت للمكان المحدد وياي يقين وابوهه ، وصلنا للمكان كان مليان شرطة وضباط

الاب: يله بابا املي استمارتكم

حنين:ملينة الاستمارات ودخلنا للمقابلة ايشوفون الوزن و الطول وسألونا كم سؤال وطلبو فحوصات طبية استغرق ايام وكملنا جميع الا جراءات الروتينيه ، رجعنا الهم سلمنا باقي الفحوصات ونطونا موعد القبوللات .

يقين: هاهيه كملنا كلشي بعد بس الايميل ننتظرة اذا يوصل معناها انقبلنا

حنين: ببتسامة

واذا ما وصل يعني انرفضنا

يقين: بنتر

يوووصل لتصيرين بومة

حنين: بهمس

ابوج واكف جان خوش رديت عليج رد اله اخلي الضباط ايطفرون منا

يقين: اخاف من ردودج استري علينا وخل نطلع

حنين: اوك

رغم روحتي بس كنت اتوقع راح انرفض مثل كل مقابلة حد اليوم الغير طريق حياتي  ...

كاعدة اتصفح بمواقع التواصل مثل كل يوم فجأة وصلني اشعار على الايميل  ... تم قبولك

صفنت على الاشعار بدون استيعاب : يا قبول؟

دخلت على الايميل كان من نفس اسم المركز القدمت عليه ، احتلتني مشاعر مختلطة انتصر عليهن فرحتي بقبولي رغم الخوف الحتلني بوقتها ماعرف سبب الخوف والقلق يمكن لان اول مرة اقدم بهيج مكان؟ لو متخوفة من شغلة التدريب ؟ لو شنو؟قطع صوت افكاري اتصال من يقين فتحت خط وصلني صوتها المزوج بحماس …

يقين : لجججج قبلوووونييي

حنين: بعدم اهتمام

اي خوش اني هم قبلوني

يقين: اي ادري شفت اسمج بقوائم القبول حضري نفسج باجر اول يوم دوام

حنين : باجر ؟

يقين:  ايي اييي باجررر ماااصدك تحققق حلمييي وراح ادخللل هل مجااال

: ليش هيج متحمسة؟

-اكلها حققت حلميي تكليي ليش متحمسسة ولجج اليووم اسوووي حفلة للصبح

: لا تتحمسين بعدنا مافهمنا شي منهم

-احس انولدت يقين الفنت عمرها كله حتى توصل لهل يوم راح امسك السلاح بأيدي واللبس الزي الحلمت كل عمري بي

:غمضت عيوني وتنهدت بملل

رجعي للواقع و تركي احلامج الوردية بالنهاية انتِ مجرد مفتشة تكعدين بمكانج وتسكتين مراح ادخلين مداهمات حتى لو انطوج اسلاح حيكون شي رمزي لا اقل ولا اكثر

-اوو شلوون بييج خليني بفرحتي

: ارجعج للواقع حتى ماتنصدمين بعدين

- اعيش اليوم بيومة معلينا باجر شيصير روحي جهزي نفسج من هسه

: تمام باجر نلقتي

- سلااام

: سلام