بعيد عن دوشه الجزيره كان جوليان ومعاه سيلين في مطعم هادي بيتناولوا الغدا.
جوليان كان متوتر شوية ومش عارف يبدأ كلام ازاي فقالها بابتسامة مرتبكة: فستانك لطيف جدا.
ابتسمت سيلين بخجل: متشكره جدا.
-سألها جوليان: قولتي انك مدرسه انجليش بتدرسي لأي صف؟
-بدرس للصف الثانوي.
-قالها بضحكه خفيفه: المكان هنا هادي جدا احسن من دوشة الجزيره، لاحظت انك اتعودتي بسرعه على المكان هناك.
-ردت بإبتسامه لطيفه: مش اتعودت اوي بس فكره البنات هناك ودودين جدا وممكن تستغرب اللي بقوله خصوصا فاليريا.
-رفع حاجبه بإندهاش: فاليريا! لاحظت انها منعزله شويه عن الباقيين.
-هي فعلا كده بس هي مش بتحب تتعامل مع الناس بسرعة لكن لو اتكلمت معاها هتحس براحه كبيره.
-فعلا اوقات الانطباعات الاولي مش دايما صح خصوصا لو مش اتعاملتي معاها.
-ابتسمت سيلين وقالتله: بس قولتلي انك محامي صح؟
-صح.
-علشان كدا كلامك موزون ودقيق الملاحظه، الهدوء ده اكيد جاي من طبيعة شغلك.
-ابتسم جوليان وراحت حيرته وتوتره: بالظبط.. المحاماة محتاجة طول بال وقراءة للي بين السطور، لأن أقل كلمة أو تفصيلة بتفرق في القضية.
-ردت سيلين بضحكة: ده إحنا زمايل بقى! التدريس كمان محتاج صبر عشان نوصل الفكرة للطلاب.
-ضحك جوليان وبدأ يفك أكتر ويحكي عن قضاياه والمواقف الغريبة اللي بتعدي عليه، وكانت سيلين بتسمعه بهدوء بابتسامة وتومأ برأسها إنها مهتمة بكل كلمة.
المطعم كان بيقدم خدمه الصور للكابلز، فاقترحت سيلين عليه: اي رايك ناخد صور؟
-وافق جوليان فورا واتصوروا كذا صوره واستأذنوا المطعم ياخدوا صوره منهم كذكري.
-بدأوا يتمشوا شويه وسالها: عندك هوايات معينه؟
-ردت سيلين: بحب القراءه جدا وخصوصا الأدب الانجليزي.
-بصلها بإبتسامه وقالها: تعالي اخدك لمكان هتحبيه جدا.
فضلوا يتمشوا شويه ودخلوا مكتبه كبيره وسيلين فرحت جدا وفضلت تقلب في الكتب ومع كل كتاب تمسكه تفضل تشرحله بيتكلم عن اي، وكان جوليان مركز معاها وبيبصلها بإهتمام.
وهما مروحين قالها: انتظريني لحظه هنا. ورجع بسرعه واشتري ليها فاصل كتب مرسوم عليه ازهار الفاونيا ومكتوب عليها:
Some chapters are meant to be read slowly
-رجع ليها بسرعه: بعتذر اتاخرت عليكي بس حبيت اهديكي حاجه اتمني تقبليها مني، واعطاها فاصل الكتب.
-خجلت سيلين وابتسمت: متشكره. وفتحت الهديه وفرحت جدا: جميله اوي. قرأت اللى مكتوب على الفاصل ونظرت ليه وابتسمت بعينيها.
فات بعض الوقت وكان لسه موعدهم لسه مش خلص فقرروا يتفرجوا على المحلات شويه، ولفت انتباه جوليان وجود صاله بولينج فقال: اي رايك نلعب شويه؟
-ردت بحماس: موافقه اهو نكسر طبيعه اليوم شويه.
جوليان ثني حرف القميص كدا لغايه الكوع وقعد يشرحلها ازاي تشوط الكورة وتوازن جسمها، في الأول رميت الكورة غلط وراحت في المجرى وضحكت بكسوف، فجوليان وقفلها وراها بلباقة ووجهها بالراحة لحد ما رمت كورة صح وجابت نقطة وكسبت الدور!
تنططت سيلين بالفرحة، فابتسم جوليان بمرح وقالها: بما انك دلوقتي بقيتي محترفة بتعرفي تلعبي اي رايك نتنافس بجد في الدور الجاي واللُّزر يعمل القهوة؟
ضحكت سيلين بثقة وهي بتستعد: موافقة وقبلت التحدي.. وجاهزة أكسسبك يا سيادة المحامي!
في غرفة التحكم
-جيسيكا وهي تبتسم: "أعتقد إن جوليان كان متوتر في بداية الموعد، لكن سيلين عرفت تخليه يحس بالراحة من غير ما تحاول."
-مايكل: "اتفق. أكثر حاجة لفتت انتباهي إن الحوار بينهم كان طبيعي جدًا، مفيش استعراض ولا محاولة لإبهار الطرف التاني."
-جيسيكا: "ولقطة فاصل الكتب كانت لطيفة. واضح إنه كان مركز في كلامها، ولما عرف إنها بتحب القراءة اختار هدية بسيطة لكن مناسبة لشخصيتها."
-مايكل مبتسمًا: "وده فرق كبير بين إنه يشتري أي هدية وخلاص، وبين إنه يختار حاجة لها معنى."
-جيسيكا: "حتى في البولينج، المنافسة كانت مرحة. لا هو اتضايق لما كسبته، ولا هي اتكسفت لما غلطت في البداية."
-مايكل: "أنا شايف إن الاتنين عندهم انسجام هادئ. لسه بدري جدًا نتكلم عن إعجاب أو مشاعر، لكن واضح إنهم مرتاحين في وجود بعض."
-جيسيكا: "وأحيانًا الراحة دي بتكون بداية أحسن من الانجذاب السريع."
تعليقات الجمهور
"فاصل الكتب كسبني... والله حركة جميلة جدًا. 🥹📚"
"الثنائي ده مريح للأعصاب... بعيد عن الدراما."
جوليان الراعي الرسمي لل Green Flag من غير نقاش. 💚"
"الجملة اللي على فاصل الكتب دي لازم تبروز! بجد فكرة عبقرية ولايقة عليهم أوي 👌"
في نفس الليلة، أول ما سيلين دخلت أوضة البنات بالراحة عشان متصحيهمش، لقيتهم لسه صاحيين.
قعدت كلوي على السرير وسألت سيلين بفضول: ها يا سيلين! احكي لنا بسرعة، موعدك مع جوليان كان عامل إزاي؟
ابتسمت سيلين بكسوف وقعدت وسطهم: بجد كان موعد لطيف وهادي أوي.. جوليان طلع شخص جنتلمان ومحترم جداً.
سألتها إيميلي بابتسامة: وإداكي الهدية اللي معاكي دي؟
سيلين: أها، أخدني مكتبة كبيرة عشان بحب القراءة، وإداني فاصل كتب محفور عليه زهرة الفاونيا ومكتوب عليه جملة رقيقة أوي.
بصت إيميلي لفاليريا وقالتلها: وإنتي يا فاليريا؟ مش هتحكي لنا شوية عن موعدك مع ماثيو ولا هتفضلي ساكتة كدة؟
فاليريا ابتسمت ابتسامة هادية وغامضة وقالت بصوت هادي: الموعد كان لطيف.. ماثيو شخص هادي وراقي، وأتوقع إننا قدرنا نفهم بعض بشكل كويس.
وسكتت كعادتها ورجعت لشرودها، فبصت لسيلين وقالتلها بصدق: بس جوليان فعلاً باين إنه مهتم بيكي بجد يا سيلين.
وفي أوضة الشباب، جوليان دخل والشباب قاعدين بيتكلموا
سألهم لوكاس : ها احكوا لنا عملتم إيه في مواعيدكم؟
جوليان وهو بيقلع ساعته ابتسم وقالهم: سيلين شخصية راقية أوي وعقلها كبير، القعدة معاها كانت مريحة بعيد عن أي شو.. وكمان لعبنا بولينج وكانت روحها حلوة جداً.
بصوا لماثيو وسألوه: وأنت يا ماثيو؟ انطباعك إيه عن فاليريا؟
ماثيو هز رأسه بارتياح وقال: فاليريا شخصية هادية وغامضة شوية، مش من النوع اللي بيكشف ورقه بسرعة.. بس الكلام معاها ممتع جداً وعميق، ومبسوط إني أخدت الفرصة دي معاها.
الصبح بدري، الشمس طلعت، ووصلت العربية اللي فيها دييجو وروكسانا بعد ما قضوا ليلتهم.
دخل دييجو أوضة الشباب بدوشته وحماسه المعتاد: يا شباب! صباح الفل! أنتم فاتكم ليله اسطوريه وقعد يحكي ليهم كل اللى حصل معاه هو وروكسان.
وفي أوضة البنات، دخلت روكسانا وهي متحمسة جداً وبتبص في المراية وتظبط شعرها: يا بنات مش قادرة أحكي لكم على جمال المنتجع! والجميل إن دييجو دم خفيف أوي بس حسيته مش استايلي أووي جايز محتاجين نتعرف أكتر.
