اليوم العشرون

"عشر القطاف.. وأشواق المعتكف"

مع غياب شمس اليوم العشرين، ساد البيت جو من الهيبة والترقب؛ فهذه الليلة هي أولى ليالي العشر الأواخر. كان "عادل" قد أحضر حقيبة صغيرة وضع فيها مصحفه وبعض ملابسه البسيطة، وقال بنبرة يملؤها الشوق: يا جماعة، أنا استأذنت من شغلي، وقررت أعتكف السنة دي في مسجد الحارة الكبير. محتاج أهرب من التليفونات، ومن الإيميلات، ومن دوشة الدنيا.. عايز أحس بروحانية العشر الأواخر زي ما كنت بسمع عنها زمان."

نظرت إليه "زينب" ببعض القلق وقالت: تروح وترجع بالسلامة يا حبيبي ، بس البيت هيتطفي من غيرك! وبعدين مين هيشيل معايا طلبات العيد؟ ومين هيودي الولاد الدروس؟ إنت اخترت أصعب وقت تسيبنا فيه!

رد "عمر" وهو يحاول إخفاء إعجابه بقرار والده: يا بابا، اعتكاف يعني 10 أيام في المسجد؟ طيب وبالنسبة لماتشات البلايستيشن اللي كنا بنلعبها بعد التراويح؟ مين هينافسني؟ وبعدين إنت هتقدر تقعد من غير نت كل ده؟

هنا، وضعت الجدة "هنية" يدها على كتف "عمر" وقالت بابتسامة فخر: سيبه يا عمر، ده رايح يجدد روحه، زمان يا ولاد، كان الاعتكاف ده هو 'عيد القلوب' قبل عيد الأبدان. كنا نشوف الرجالة يدخلوا المساجد بشنطهم، والستات يبعتوا لهم الفطار والسحور في مناديل قماش مطرزة، والحتة كلها تبقى في حالة طوارئ عبادة. مكنش حد بيشتكي من غياب حد، لأننا عارفين إنه في ضيافة الكريم.

التفتت الجدة لعمر وسلمى وقالت: وإنت يا واد يا عمر، بدل ما تسأل على البلايستيشن، اسأل أبوك: إزاي أعتكف وأنا في بيتي؟. الاعتكاف مش بس حيطان مسجد، الاعتكاف هو إنك تعتكف بقلبك عن كل حاجة بتشغلك عن ربنا.وانتي يا سلمى، اعتزلِي الموبايل واللايكات الـ 10 أيام دول، واعتبري نفسك في خلوة مع ربنا.. ده برضو اعتكاف.

قالت "سلمى" بتأثر: بس يا تيتا، الدنيا حوالينا صعبة أوي، والواحد بيحس إنه لو قفل موبايله يوم، العالم هيقع!

ضحكت الجدة وقالت: العالم مش هيقع يا بنتي، بس قلبك هو اللي هيقوم. زمان مكنش فيه موبايلات، وكان التواصل بالدعا. لما كان عادل يسافر، كنت أقول لزينب: ادعي له في سجدتك، دي أحسن من مية مكالمة. يا ولاد، العشر الأواخر دول هم 'كريمة' السنة. اللي بيضيعهم في التدوير على لبس العيد وكحك العيد، بيخسر جوهرة الشهر.

نظر عادل لزوجته وقال بامتنان: يا زينب، أنا هعتكف بس قلبي معاكم، وهدعيلكم في كل سجدة. والطلبات هبعت لعمر يخلصها، خليه يتعلم الرجولة ويشيل مكاني شوية.

قال عمر : خلاص يا بابا، وانا قدها، بس بشرط.. تدعي لي ربنا يكرمني في امتحان الجغرافيا، عشان الجغرافيا محتاجة معجزة مش مجرد مذاكرة!

ردت الجدة بضحكة: هيدعي لك يا واد، بس إنت ابذل مجهود عشان ربنا يبارك في الدعوة. يا ولاد، العشر الأواخر دول فيهم ليلة بألف شهر. تخيلوا كدة، ليلة واحدة تمسح تعب سنين، وتغير قدرك للأحسن. حد يفرط في الجمال ده عشان مسلسل ولا خناقة على لون قميص العيد؟

الرسالة المستفادة:

"الاعتكافُ هو هجرةُ الروحِ إلى خالقِها." سواء اعتكفت في المسجد كعادل، أو اعتكفت بقلبك في بيتك كزينب وسلمى، المهم هو تفريغ القلب لله في هذه الأيام المباركة. العشر الأواخر هي فرصتكم الأخيرة للتعويض والقطاف. لا تجعلوا انشغالات العيد وفرحتة تسرق منكم عظمة "ليلة القدر". اعتزلوا ما يؤذي أرواحكم، واقتربوا ممن يحييها، فرمضان يوشك على الرحيل، والجوائز لا تنالها إلا القلوب اليقظة.

الخاتمة:

ودّع الجميع عادل وهو يتوجه للمسجد، وساد البيت جو من الخشوع والسكينة. أغلقت سلمى هاتفها، وجلست بجانب جدتها تسبح، وقرر عمر أن يخصص ساعة يومياً للتدبر بعيداً عن الألعاب.

قالت الجدة هنية وهي تنظر للسماء من الشرفة: أهو كده يا ولاد.. ريحة الجنة بدأت تهفهف. العشر الأواخر دول هم جائزة الصابرين. شدوا الحيل، وخليكم دايماً جاهزين لنفحات ربنا، يمكن الليلة دي تكون هي الليلة.

غمزت زينب لسلمى وقالت: تصدقي يا سلمى؟ البيت من غير بابا ملهوش مش هيبقاله حس، بس إحساس إننا بنسنده وهو بيعبد ربنا، مخلي قلبي مرتاح.

ردت الجدة : عشان البيوت بتعمر بـ التقوى يا بنتي، مش بـ العفش. ربنا يتقبل منه ومنكم، ويبلغنا ليلة القدر وإحنا في أحسن حال.