نبضة النهاية

التاريخ: الخميس، 13 أغسطس 2026

الساعة: 9:15 مساءً

المكان: محطة العاصمة الإدارية الجديدة.

خارج أسوار المحطة، كانت شوارع مصر بدأت تدخل في حالة "السكون الإجباري" المعتاد. المحلات قفلت أبوابها، والكافيهات بدأت تلم كراسيها تنفيذًا لقرار الغلق في تمام التاسعة.

الهدوء كان بيسيطر على المحافظات، لكن جوه غرف التحكم في المحطة، كان فيه "غليان" من نوع تاني.

في ممر المحولات العملاقة، كان "صابر" فني التشغيل، بيجري ومن وراه صوت أجهزة الإنذار اللي بدأت تصفر بنغمة متقطعة ومزعجة.

 دخل مكتب المشرف وهو بينهج، ووشه شاحب كانه هيموت.

صابر: (بصوت مرتعش) "يا باشمهندس.. المحولات في القطاع (C) حرارتها عدت الخط الأحمر، التبريد مش ملاحق، والضغط على الشبكة بيعلى بشكل مش منطقي!"

المشرف "محمود" قام من مكان بذهول، وبص على شاشات المراقبة اللي كانت كلها منورة باللون الاحمر.

المهندس محمود: "إزاي يا صابر؟ ده إحنا لسه مخلصين ذروة الأحمال، والمفروض المحلات قفلت والضغط قل!"

صابر: "المشكلة مش في الأحمال يا فندم، المشكلة في "النبضة" اللي حصلت في المولدات فجأة.

التروس بتصرخ، والمحولات لو سخنت أكتر من كده، "السيستم" كله هيقع.. والمرة دي مش هيفصل عن حي ولا مدينة، المرة دي مصر كلها هتضلم في ثانية واحدة."

بص المهندس محمود للساعة، كانت 9:30 مساءً.

في اللحظة دي، النور في المكتب "رعش" مرتين.. وصوت المولدات برا بدأ يتغير من "الزنين" المنتظم لـ "خبط" عالي، كأن قلب المحطة بيلفظ أنفاسه الأخيرة.

المهندس محمود: "ارفع حالة الطوارئ القصوى.. وبلغ السيطرة المركزية إننا احتمال نفقد الشبكة القومية بالكامل.. دلوقتي!"