أو ماي جاد حجوجات!!؟

سكريبت كوميدي

- اسمك ايه يا حاج؟

= الحقيقي ولا الفيسبوك؟

- قول الأتنين

= ع الفيسبوك اسمي عبد الصمد عبد العزيز

- وفي الحقيقة؟

= عبد الصمد عبد العزيز

- ايه ده برضو؟

= اه!، هيبقى اسمي ع الفيسبوك عبد الصمد عبد العزيز، وفي الحقيقة اسمي بوفتيك بالرده؟

- صح أنت صح يا حاج، قولي ايه اللي جابك هنا؟

= الزمن

- لاء بالله عليك يا حاج بلاش جو الزمن اللي جابني هنا، وياريت اللي جرى ما كان، والشعر شاب، والحاجات دي

= لاء خلي بالك، أنا شعري شاب .. بس لسه شباب

- وات ايڤر عن كلامك اللي مش مريح وحاساه في تلميحات مش كويسة، بس لقاء النهاردة عشان أوصل لـ الناس فكرة "بر الوالدين" وكدة، تحب تقول ايه لـ كل المشاهدين اللي بيشوفوك دلوقتي يا حاج؟

= حسبي الله ونعم الوكيل

- بس كده؟، مش عايز تقول حسبي الله ونعم الوكيل في مين؟

= في ابني جلال!

- اه

= وااد يا جلال!!؟، أنا أبوك ياالا!، نسيتني ونسيت ان خيري عليك يا معفن!!، يا ابن الكـ ـلب!!

- بليز بلاش ألفاظ يا حاج

= لاموأخذه يا آنسة، مش هقول ألفاظ، بس ممكن أفكره بشوية حاجات؟

- مادام مش هتضايق الرقابة يبقى انطلق!

= وااد يا جلال!؟، نسيت لما كنت تقعد ع البنطلون وبعد أما تقوم الاقيه اتملى ميه!!؟، كنا مسميينك جلال ديسبينسر يالاا!!

- خلاص يا حاج بلاش معايرات

= أنا ترميني في دار المسنين!!؟ .. شايفني بسنن!!؟، يا خسارة تعبي عليك .. يا خيبتي في عيالي!

- خلاص يا حاج، بليز بلاش عياط، عايز تقول حاجة تاني؟

= اه!، فاكر ياض لما جيتلي وقولتلي إنك حضرت عفريت بالغلط؟! .. فاكر؟! .. وأنا اللي شيلت الليلة في الآخر!؟

- ايه ده ابنك حضر عفريت؟

= اه، وأحنا في البيت كنا ٥ أفراد بقينا ستة بسببه، كنت وأنا راجع من الشغل بالليل وجايب العشا، لازم يبقى في زيتون مخلل مع العشا، عشان العفريت بيحبه

- ايه ده؟

= جلال!!، جايبلي عفريت أهطل بيحب الزيتون المخلل يلا!؟، مش ده المفروض يطلع يحقق الأمنيات؟!، بيحب الزيتون!!؟

- خلاص يا حاج عشان الضغط بيعلى عليك

= أنا محدش يعلى عليا!

- طب أهدى بس يا حاج

= جلال!!، فاكر ياض لما جبتلك ديك رومي وكلته على أساس أنه جبنه رومي بطعم الفراخ!!؟

- ايه الهبل ده، في حاجة في الدنيا اسمه كده؟!

= طب ما في شيبسي بالبيتزا، اركزي معايا يا مزة كده الله يكرمك

- ثانكيو يا حاج، عايز تقول أي حاجة تانية؟

= اه، علاااء!!

- مش كان اسمه جلال؟

= لأ ده العبيط اخوه .. علااء!!، فاكر لما جيبتلك البوكسر الأزرق ومن فرحتك، كنت هتروح تصيف بيه يا معفن؟!، تصيف بالبوكسر؟!

- اومال الناس بتصيف ب ايه يا حاج؟

= بالكالسون، بشمره لحد بعد ركبتي سيكا كده، وانط في الميه مش بعمل تش زي بقيت الناس تؤ تؤ

- اومال بتعمل ايه؟

= بعمل فس

- ااه قول كده بقى!

= متفهمنيش غلط، أنا عشان بنط بالعوامة بتاعتي هي اللي بتطلع الصوت ده، لكن لو نزلت من غيرها بعمل فش

- مااي جااد، عايز تقول حاجة تاني يا حاجوج؟

= رغم إني ماحجتش قبل كده، بس حاجوج طالعة منك زي اللحمة الدايبة

- ثانكيو متكسفنيش بقى

= جلاال، انا حبيت دار المسنين يلاا!، بقولك ايه ما تتجوزيني وأكسبي فيا ثواب، ده أنا قد والدتك❤️

سكريبت من تأليف روان أبو زيد

#سكريبتيكوا