امرأة على شكل رجل!

سكريبت كوميدي

---

- وسعي كده حضرتك، أنا بقالي ساعتين واقف على رجلي وعايز أركب!

فضلت بصة ناحيته وأنا مصدومة .. مش مصدقة إن بجد بقى فيه رجالة كده!

- بتشبهي عليا حضرتك؟!

الميكروباص مشي من غير ما أركب أنا وهو، ف رجعت وقفت جنبه تاني، وهو متعصب، وبيحسبن عليا في سره .. وأنا أصلاً سامعاه!

_تعرف أنا شايفة حضرتك عامل ازاي يا أستاذ..

- نور

_ينفع راجل وينفع ست فعلاً!، عموماً، عارف شايفاك ازاي؟

- ازاي؟

_ناقصلك شنطة لونها pink ومستلزمات بنات، وأوپاك على سكيرت طويلة!

- مش فاهم حاجة من اللي بتقوليه بس حاسس إنك بتتريقِ عليَّ!

_هو حضرتك شايفني بشنب؟!

- إطلاقاً

_طب شعر أيدي موجود ولا حاجة؟!

- خالص

_طب حالقة شعري وفي دقن مثلاً؟، أو صوتي تخين؟ .. أي حاجة أديتك إيحاء إني راجل مش ست؟!

- ياستي لأ!

_اومال مش عايزني أركب ليه؟!، آدي الميكروباص فاتنا أحنا الأتنين!

- أحسن!، لو كنتِ ركبتِ كان هيتحرق دمي والله!

_مش بقولك نور يمشي رجالي وحريمي عادي!؟ .. طب تخيل كده .. منظرك ايه وأنت راجع بيتك ولا رايح تقابل خطيبتك أياً كان أنت متنيل على عينك ايه اسم علاقتك العاطفية، وهي بتقولك جيت ازاي، تقوم تقولها زقيت واحدة عشان أركب أنا، تفتكر هيبقى ردة فعلها ايه؟!

- مش هتحط في دماغها، لأن اللي يهمها في الحوار ده كله؛ هو أنا! .. وعلى فكرة أنا مش خاطب ولا متجوز، أنا مطلق

_اه! تلاقيك كنت بتزقها وتركب الأول!

- التزمي حدودك يا آنسة..

_محمود!

- افندم؟!

_مادام نور طلب من البنت تستنى على رجليها عشان حرام هو يفضل مستني شوية على رجله، تبقى البت اسمها محمود!

- أنتِ حارقك أوي يعني إني مسبتكيش تركبِ؟!

_أنا حزينة عشان اللي وصلناله، تخيل زمان الراجل كان يقف في آخر الطابور عشان الست تمشي بدري، زمان الرجالة كانت بتحترم المرأة والله!

- بقولك ايه شغل حقوق المرأة و رضوى الشربيني ده مش عليَّ!

_أومال على مين يا نرنوره؟! .. ده ليها حق أقسم بالله تطلق منك! .. أقولك على حاجة؟، أقسم بالله ما هتعمر في جوازة ولا خطوبة!

- تسلمي يارب!

_وكل الستات بتستحقرك!

- ده من ذوقك والله

_نصيحة مني، هات ورقة وقلم، وخليني أكتبلك الحاجات اللي قولتلك عليها من شوية دي، الشنطة الPink والمستلزمات كلها، بس هتضطر تحلق دقنك، هي كده كده مش لايقه مع بقيت صفاتك

- خلصتِ؟!

_لأ!

مسح وشه وأتنهد عشان يحاول يكتم غضبه من رغيي، وأنا مكملة

_طب بتحس بـ ايه وأنت بتزق البت وتطلع الميكروباص، مفيش ضمير؟! مفيش إحساس؟! مفيش سنس؟! مفيش أي حاجة كده؟!

- كان فيه، بس في حوار الميكروباصات بالذات، كل الكلام ده بنساه!

_طبعاً ياختي يعني، أنتِ بتتكلمِ في ايه يا نرنورة؟!

جه الميكروباص أخيراً، وقولتله بصوت عالي عشان الفت نظر الناس

_سلام يا مدام نور!، أقصد أستاذ نور!، المرة الجاية أبقى طول الچيبة عشان كاشفة شعر رجلك!

اللي كانوا ناويين يركبوا، بصوا ليه، ونسيوا الميكروباص، قومت ركبت أول واحدة في الميكروباص، ولسه هيجري عشان يركب هو كمان

لقيت حد اداله كام بوكس وقعوه في الأرض

فعلاً .. حرص من أي راجل يزق بنت عشان يركب ميكروباص .. وبالذات لو اسمه نور✨

باقي الرجالة اللي اسمهم نور .. السكريبت ده مش موجه ليكم🥸

#سكريبتيكوا

#روان_أبو_زيد