الرومانسية في شكل آخر!

سكريبت رومانسي

---

خرجت من الأوضة ولقيته قاعد بيعزف ع الجيتار، بص ليا وبصيت ليه .. وبعدين داريت وشي و روحت ع المطبخ

ايه يعني؟!، هو عشان متخانقين أفضل حابسة نفسي في الأوضة؟!، أنا حُرة!، أقعد في الحتة اللي عايزاها!

ولأن المطبخ بار، كنت شايفاه وهو قاعد بيدندن و بيبص ليا بطرف عينه، وكنت بتظاهر اني مش واخدة بالي، أو مشغولة في النسكافيه اللي بعمله

- كنت لسه بفكر فيكِ

قالها وهو بيغني و بيعزف ع الجيتار، بيوجه الكلام ليا بطريقة غير مباشرة، واضحة جداً!، في أغنية في الدنيا بتقول كنت لسه بفكر فيكِ؟!

قولتله من غير ما ابص ناحيته

_عايز ايه؟

ملقتش اي رد، بصيت ناحيته لقيته بيبص ناحيتي باستغراب، أتعصبت من نظراته وسألته

_فيه ايه؟!

- سلامتك يا ملك، هو أنتِ بقيتِ بتكلمِ نفسك؟

_أنا برد عليك!

ضم حواجبه لبعض .. عامل مستغرب يعني! .. وقال ببرود

- ليه هو أنا ندهتلك؟

_متنرفزنيش!

- ياستي أنا كلمتك؟!، أنا قاعد في أمان الله، لقيتك طالعة من الأوضة وداخلة المطبخ، أنا بدندن اغنية بحبها، لقيتك بتكلمِ نفسك!

_بقى كده؟!

- بقى كداهو!

_بقى كده؟!

- بقى كداهو!

_ماشي يا مصطفى!، تمام!

اخدت النسكافيه وقعدت في الصالة قدامه؛ أنا قعدالك بقى!

أبتدى يعزف تاني وهو مركز .. وغمض عينه اليمين وفتح عينه الشمال وهو بيبص لـ السقف وكأنه بيفتكر حاجه، بعدين بص ناحيتي، وسألني بـ تُقل

- في حاجه؟

_لأ

- ماشي

قالها وهو بيتعدل عشان يعزف من جديد، مسكت تليفوني ومبصتش ليه .. ايه؟! .. هتنح فيه يعني؟!

- وحشتيني .. و وحشني كلامك .. هنفضل متخاصمين كده كتيــــر؟

_ودي اغنية مين إن شاء الله؟!

- ده الشاعر العظيم؛ مصطفى جوزك .. وبعدين أنا مش بكلمك، وأحنا متخانقين خلي بالك!

برّقت فيه من حرقة دمي، أما هو .. ولا الهوى! .. رجع يعزف تاني

وأنا مسكت التليفون وبدأت افتح أي نيله تلهيني عنه بقى! .. رجع يغني تاني:

- على فكره.. مكانش قصدي يا ملك

شاورتله بسرعه وكأني اكتشفت لغز

_قولت ملك!

حط صباعه السبابة ناحية بوقه وقالي وهو بيبرر

- قولت ملاك .. بس أنا باكلها بسرعه في الأغنيه ، ف سمعتيها ملك .. وبعدين هغنيلك ليه أنتِ؟! احنا مش متخانقين مع بعض؟!

أتعدلت ع الكنبه وأخدت مج النسكافيه وبدأت أشرب و بوزي شبرين قدامي وأنا ماسكه التليفون .. رجع يغني

- بلاش البوز .. بقولك آسف يا ملك!

_اهو! فيه اغنية طبيعية في الدنيا بتقول بلاش البوز يا ملك؟!

- اه أغنيتي!

_دي اغنية منيله بـ ستين نيله!

- مقبوله منك يا مراتي يا حبيبتي

جرعة البرود اللي دايماً هو فيها دي، بتخليني احس بـ حاجتين، إني عايزه اخنقه وفي نفس الوقت بضحك من جوايا ع اللي بيعملوا و بحبه أكتر! .. رجع غنى..

- مكانتش مشكلة اللي تعمل فينا كده

بصيت ليه وأنا رافعه حواجبي، شاورلي ببراءة

- بدندن الأغنية!

وكمل عزف

- خليكِ عاقله وفاهمه أن مهما هيحصل مشاكل بينا، مش هتخلصِ مني يا ملوكه

داريت ضحكتي جوايا و لمحت بطرف عيني أنه بيراقبني هو كمان .. مردتش عليه المره دي .. يللا قابل شوية من برودك يا بيه! .. رجع يغني..

- واخدالي بالك يا اللي سامعه؟

رجعت شعري ورا ودني و أنا باصه ناحية التليفون ومش مدياله إهتمام .. قام باصص ليا وهو بيغني

- بكلمك يا زفتة

رديت عليه بنفس طريقته وأنا بغني

_زفتة أما تذفتك يا حبيبي

أتكلم وشاورلي بسرعه

- قولتِ يا حبيبي!

_ده أنا بدندن اغنية!

رفع حواجبه بضحكه جانبيه على حركتي وأنا بكلمه ببراءة

هدف هدف هدف في مرمى ملك أمام زوجها مصطفى! .. أشرب يا معلم!

رجع كمل غنى:

- آسف

رديت عليه بطريقته

_على ايه؟

- عشان اتخانقت معاكِ .. مكانش ليها لازمه .. أنا عشان كنت جعان

رديت بالغنا وعلى نفس اللحن

_ابقى راعي إن مراتك لسه جديدة في المطبخ ولسه بتتعلم طبخ جديد .. مش أي اكلة هتطلبها، هتطلعها مظبوطة

وقتها بطل غنا وقالي

- طب آسف

ابتسمت وسكتت، لقيته انفعل وبيقولي

- لأ ما أنا مبقاش عمال اعزف جيتار واغنيلك وفي الآخر متسامحنيش!

ضحكت على طريقته وقولتله

_ماشي .. سامحتك!

- طب بقولك ايه؟

_اممم؟

مسك الجيتار و رجع يعزف تاني

- اعمليلي كوباية نسكافيه، عشان كوبايتك عيني فيها

_بقى كده؟

- بقى كداهو

_بقى كده؟

- بقى كداهو

ضحكنا و روحت عملتله النسكافيه .. و رجعنا وكملنا سهرتنا بنغني ع الجيتار .. والمرة دي كانت اغاني رومانسية بجد

وتأكدت أن مهما حصل .. مصطفى هو ونيسي الحقيقي .. بعيوبه و مميزاته بحبه حتى بـ بروده اللي مجنني!..❤️🌹

#سكريبتيكوا #رومانسي #روان_أبو_زيد