مكالمة مهمة!!

سكريبت كوميدي

ـــــــ

- الو؟

= الو آنسة روان أبو زيد مظبوط؟

- والله على حسب

= على حسب ايه يا فندم؟

- على حسب مشكلة ولا خبر حلو، هو لو خبر حلو يبقى أنا روان أبو زيد

= طب لو مشكلة؟

- أنتِ عبيطة؟!، يبقى مش أنا روان أبو زيد!

= صح يا فندم، عموماً الخبر حلو، وحلو جداً كمان!

- مين معايا بس عشان أفهم؟!

= معاكِ منال من شركة طلعت مصطفى

- مين طلعت مصطفى؟

= طلعت مصطفى صاحب إعلانات مدينتي و الرحاب والحاجات دي!

- اه الإعلان اللي بتشحتف وبتحـ ـسر عليه كل سنة ده؟!

= هو بـ عينه يا فندم

- ماله يا منال؟!

= عامل تخفيض على ڤيلا في مدينتي بدلاً من ١٠٠ مليون هيخليها ٧٠ مليون بس!

- ما تهزيها شوية، أعتبريني أختك، ده أنتِ أول مرة تكلميني!

= يا فندم بقولك عامل تخفيض ومنزل السعر ٣٠ مليون أهز السعر ايه أكتر من كده؟!

- صح صح عندك حق!، طب الڤيلا دي فيها حمام سباحة؟!

= لأ

- يا خسارة كنت عايزاها بحمام سباحة، طب كده مفيش نصيب، أشوفك المكالمة الجاية إن شاء الله!

= بس متوفر ڤيلل تانية بحمام سباحة

- بكام يا منال؟!

= بـ ٤٠ مليون

- ايه ده اللي بـ حمام سباحة بـ ٤٠ مليون واللي من غير بـ ٧٠ مليون؟!، هو حمام السباحة معمول فيه حمام ولا ايه؟!

= لأ بس مش شغال أوي خصوصاً إن أحنا في موسم شتا

- شتا ايه بس يا منال؟!، صلي ع النبي!، ده العيال دلوقتي بينزلوا من بيوتهم بالبناطيل بس!

= عليه أفضل الصلاة والسلام، يمكن اختلاف طقس مش أكتر، طيب نويتِ على ايه؟، بـ حمام سباحة أو من غير؟

- فيه جنينة؟!

= فيه جنينة طبعاً!

- يا خسارة مكنتش عايزاها بجنينة!

= متوفر من غير جنينة يا فندم!

- يادي النيلة السودة!

= بتقولِ حاجة يا فندم؟!

- لأ يا حبيبتي، طب كام أوضة؟!

= ٦ أوض

- طب أنا عايزاها ٧ بقى!

= فيه ٧ أوض

- كل أوضة بحمام!

= في كل أوضة حمام!

- طب عايزة لكل أوضة بلكونة يعني ٧ بلكونات

= لأ هما ٨ يا فندم

- شوفتِ بقى؟!، أنا كنت عايزاهم ٧ مش ٨!

= يا فندم ٧ بلكونات للغرف، وبلكونة للمطبخ

- طب ما تعملوا بلكونة للحمام، بحيث لو حبيت أشم شوية هوا في التواليت!

= بتقولِ حاجة يا فندم؟

- لأ مش بقول!، طيب هشوف الحكاية دي وأرد عليكِ!

= تردِ عليا امتى؟!

- هنزل من العربية الBMW بتاعتي وأكلمك

= هو ايه صوت الألـ ـفاظ اللي جنب حضرتك دي؟

- لأ متاخديش في بالك ده ٢ سواقين توك توك بيتخانقوا مع بعض، مين هيركبني معاه!، تحسي البـ ـلد كلها طمعـ. ـانة فيا النهاردة!، مقولتليش يا منال، أنتوا جبتوا رقمي منين؟!

= من السيستم بتاعنا!

- طب عايزاكِ تبعتيلي أرقام اللي شغالين معاكِ في السيستم دول واحد واحد عشان أعملهم بلوكات، ده أنتوا رابع مرة تكلموني الشهر ده؟! .. ايه؟!، مستكترين عليا الـ ٦٠ جنية اللي حيلتي!!؟، حسبي الله ونعم الوكيل!!

#سكريبتيكوا

#روان_أبو_زيد