أنا والحبوب وهواك - أسامة منير

سكريبت كوميدي - رومانسي

- يا مساء الخير عليكم في برنامجكم الإذاعي المحبوب "أنا والحبوب وهواك" من ١٢ لـ ٢ بليل ومعانا إتصال تليفوني ونقول .. الو؟

= الو؟، ازيك يا أسامة؟

- الحمدلله تمام اخبارك ايه؟

= الحمدلله

- اتعرف بيكِ؟

= عين

- مش عايزة تقولي اسمك ف هناديكِ بـ عين؟

= لأ أنا اسمي عين!

- على كده اختك غين فين هعهعهعهعهعهع

= افندم؟

- آسف بهزر .. عندك كام سنة يا عين؟

=  ٢٤ سنة

- مرتبطة؟

= كنت!

- عن حب ولا صالونات؟

= لأ عن حب

- احكيلي ايه مشكلتك؟

= الموضوع بدأ لما نزلت عشان اشتري الشبت لـ امي عشان تعملنا المحشي .. وقتها قابلته .. كان واقف عند المحل اللي جنب بتاع الخضار بيشتري بطة

- بطة؟

= اه تلاقيه كان عنده عزومة!

- كملي

= بصتله وسرحت في عينيه .. اينعم كان واقف بالجنب فـ معرفتش اشوف عينه كلها .. بس كان وسيم اوي! .. حبيته من أول بطة .. قصدي من اول بصة!

- ايوه ايوه فاهم!

= المهم .. بصلي هو كمان .. وفضلنا تايهين في عيون بعض .. اكتشفت إن عينه بالجنب اجمل من عينه كلها بكتير .. بس مش مشكلة .. فضلنا متنحين .. ومفوقناش غير على صوت ميكرفون الراجل جنبي وهو بيقول ( بواااااقي زيت السمك!!، بواقي زيت الطعااام، الكيلو بـ عشرين جنياااااه!. )

- عارفهم دول

= أنا فاكرة كويس اليوم ده، وقتها طلعت ل امي ب بقدونس مش شبت و رنتني علقة!

- الله ع الرومانسية

= يللا مش مشكلة كله يهون عشان خاطره

- ايوه

= المهم مكانش مشوار السوق ده بحب انزله، ومن يوم ما شوفته وانا بنزل كل يوم عشان اشوفه بس مكنتش بلاقيه

- تلاقيكي خـ. ـاربة بيت أمك

= اه والله، المهم نزلت في يوم وكنت بشتري قلقاس من عند نفس الراجل .. لحد ما لقيته واقف جنبي بيشتري بطاطس .. بصتله .. نظرة فـ ابتسامة فـ سلام فـ كلام فـ طلع متجوز!

- ايـــــه!!؟ ازاي؟

= لقيت واحدة بتمسكه من قفاه وبتقوله بغضب: جبت البطاطس!!؟ .. رد عليها وقال بخوف: بوزنها، قالتله طب متتأخرش! عشان و عهد الله لو اتأرخت لا اكون طاردة امك بره البيت!! قالها حاضر

- طلعت مراته؟

= اه

- وبعدين

= بس كده، ويومها رجعت وشغلت اغنية تخونوه بتاعة عبد الحليم حافظ .. تخونوه وعمره ما خانكم ولا اشتكى منكم!

- ايوه عارفها!، يعني هي دي قصة الحب؟

= اه

- تصدقي بـ الله؟

= لا إله إلا الله

- أنا ضيعت وقتي في الحلقة معاكي!!

= ليه بس يا دكتور .. تيت تيت تيت تيت تيت.

#روان_ابو_زيد

#سكريبتيكوا