نور عيني ( موت إسلام )

كلنا أتفرجنا ع المشهد الشهير من فيلم نور عيني، لما تامر حسني "أحمد" ودع أخوه "إسلام" لما أتوفى، وقد ايه كلنا أتأثرنا بيه، تعالوا نتخيل لو كان المشهد كوميدي

- إسلام .. واد يا إسلام؟! .. أنت موتّ؟

_لأ مريح شوية!

- طب ازاي بترد عليا؟

_يا عم أنت أستفزتني! ايه أنت موتّ دي؟! ايه السؤال الغبي ده؟! .. على أساس لما تسألني هرد عليك يعني؟!

- ما أنت رديت أهو!

_يا عم أنا لسه بين الموت والصحيان

- طب تصبح على خير يا حبيبي، أطفيلك النور وأنا خارج؟

_خد يا أحمد تعالى هنا!

- ايه ياخويا؟

_بص عشان خلاص والله أنا مش فاضلي كتير وهموت، عايزك تكتب وصيتي

- وصية مين يا ابو ١٩ سنة؟، هتوصي على ايه؟!، ده أنت لسه قا لع البامبظ من كام سنة!، ايه؟! هتوصي البامبظ يدفن معاك؟!

_بطل سخرية من روحي المعنويه!

- طيب يا ابو روح معنويه!، قولي ايه هي وصيتك

_التيشيرت الأحمر اللي في الرف التاني ع اليمين

- أبو خرم في الضهر ده؟

_اه

- لأ مش عارفه!

_يا أحمد بتكلم جد!، أوعى تعمل التيشيرتات بتاعتي خرق مطبخ!

- ليه هعمل بيها ايه بعد ما تموت؟، ما استخدمها في حاجة مفيده

_أقسم بالله يا أحمد لو عملت كده، بعد ما اموت، لا هتخش المطبخ في مرة هتلاقيني قاعد بقشر بطاطس!، أنت حر!

- اومال أعمل ايه؟

_طلعها لـ الله يا أخي!، كفـ ـر عن ذنـ ـوبك شويه!

- ماشي!، عايز حاجة تاني؟!

_اه عايز اعترفلك اعتراف

- أنت اللي خلصت سندوتش الشاورما بتاعي وأنا نايم، وكدبت لما قولتلي إن تونه هي اللي أكلته !؟

_ايه ده أنت عرفت؟!

- عرفت؟!

_عموماً مش ده اللي عايز أقوله!، الإعتراف هو .. إني .. إني .. إني!

- أخلص يابا!، مفاضلش كتير في عمرك ولا ده أوڤر تايم عندك؟!

_بصراحة اللي عايز أقوله .. إني..

- ياختاااااي!!، إنك ايه؟!

_إني مش هموت يا حماده

- ايه ده؟!

_يس!، أنا مش هموت دي كانت مفاجأة ليك يا حمودي عشان عيد ميلادك، كل سنة وأنت طيب، وعقبال مليووون سنه!

- أيه العبط ده؟!

روان أبو زيد ✨

#سكريبتيكوا

#روان_أبو_زيد