كداب في أصل وشك!!

سكريبت كوميدي

---

أنا عمري ما كنت ست شكاكه، حتى وأنا بدور في تليفون جوزي بعد ما يموت، قصدي ما ينام! .. بتطمن عليه!، عادي يعني .. أي واحدة ست بتخاف على جوزها هتعمل زيي!

في يوم كنت بفتش قصدي بتطمن على جوزي زي كل يوم بعد ما ينام، ولقيته بيكلم بنات؟!، بنات باعتين ليك يا حسن؟! بنات باعتين ليك يا أبو علي؟! وفي يوم واحد؟! وفين؟! على تليفونك؟!

فتشت في الرسايل بينه وبين كل واحدة، اللي تقوله يا حبيبي، واللي تقوله يا روحي، واللي تقوله كتكوتي، واللي تقوله يا بيبي .. بيبي؟! حسن منفلة تقولوا له يا بيبي؟! لو بس تشوفوا كرشه! هتشيلوا حرف الـ ( ي ) وتخلوها ببي!

قررت هاخد حقي بس بهدوء! .. تاني يوم راح الشغل و رجع

لقاني قاعدة في الصالة وجنبي جهاز صغير شبه التابلت، سألني:

- ايه اللي في ايدك ده؟

_تعالى يا حسن!

بص ليا بقلق، وبعدين قرب مني وقعد قدامي بهدوء

_كنت فين يا ابو علي؟

- في الشغل، وايه الجو ده؟!، أنا عايز آكل! أنا جعان!

_مين ايمي؟!

هنا ارتبك جداً، وابتدى يبلع ريقه بالعافية وبعدين لقيته بيقولي

- مـ..مين ايمي؟!

ضحكت وأنا ببص للجهاز وقولتله

_تعرف يا حسن ايه اللي في أيدي ده؟! .. ده جهاز كشف الكذب!

قال وهو مرتبك

- ايه ده!؟، مش باين عليه خالص!

مسكت أيده وحطيتها على الجهاز، قولتله

_اول سؤال، مين ايمي دي يا حسن؟!

- معرفهاش

هنا لقيت الجهاز بيزمر وبيقول الجملة لما حد بيكدب "كداب في أصل وشك .. كداب في أصل وشك"

- الجهاز بيقول كداب في أصل وشك؟!

_ده أنت ليلتك سودا يا ابو علي!

- ما تهدي كده وصلي ع النبي

_عليه أفضل الصلاة والسلام!، السؤال التاني!، عرفتها ازاي؟!

- معرفهاش يابنتي!

"كداب في أصل وشك .. كداب في أصل وشك"

ابتسمت له بخبث وقولتله

_قول متخافش!، عرفتها منين؟!

فضل ساكت شوية بعدين قالي

- زميلتي في الشغل

"كداب في أصل وشك"

- اا.. أقصد صاحبتي من زمان!

"كداب في أصل وشك"

- أقصد جارتي من أيام المطرية

قولتله أنا والجهاز مع بعض

_كداب في أصل وشك!، جارتك من المطرية واسمها ايمي يا ابن مشمشه المحروقة؟!

- اتعرفت عليها عن طريق النت!

هنا الجهاز مرنش، عرفت أنه صادق

_علاقتكوا وصلت لحد فين؟!

- تعارف بسيط

"كداب في أصل وشك"

- صداقة يعني

"كداب في أصل وشك"

- احم! مواعدها بالجواز

_حلاوتها ام حسن!

- متغلطيش في أمي يا داليا!

_لأ دي جملة عادية بتتقال، طيب!، وهي بتحبك

- اه

_كدبت عليها في ايه بقى تاني غير انك مش متجوز!؟

- عرفتِ منين الحكاية دي؟!

ارتبكت شوية وبعدين قولتله

_ما أنت لسه قايل!

"كدابة في أصل وشك"

_أقصد يعني واضح من كلامك

"كدابة في أصل وشك"

_بس يا ابن الهبلة!

"كدابة في أصل وشك"

- أنتِ أصلاً عرفتِ منين ايمي ومش ايمي؟!

_توقعت اسمها، عشان أنت بتحب ايمي سمير غانم

"كدابة في أصل وشك"

- طب بالصلاة ع النبي كده، أنتِ بتتجسسي عليا يا داليا صح؟!

_اطلاقاً

"كدابة في أصل وشك"

_هو الحقيقة إني فتحت تليفونك بالصدفة كده فـ..

"كدابة في أصل وشك"

_يعني فتحت التليفون عشان كنت بشحنه

"كدابة في أصل وشك"

_من الآخر، بقالي فترة بدور وراك عشان شاكة فيك

الجهاز متكلمش، و حسن كان متفاجيء مني

_بقولك ايه!، تعالى نعمل معاهدة سلام، عشان الجهاز ده فضحنا

"كدابة في أصل وشك"

_انا قولت ايه دلوقتي يوحيلك إني بكدب؟!

- بقولك ايه يا داليا ده شكله بيعلق، على فكرة كل اللي قولته صح

"كداب في أصل وشك"

_ده أحنا لسه بنفكر! بنفكر نعمل معاهدة سلام!، من أولها تكدب تاني؟!، بص بقى

"كدابة في أصل وشك"

تجاهلت صوت الجهاز المستفذ، وقولت لـ حسن

_هتمسح كل البنات على تليفونك ماشي؟

- موافق

"كداب في أصل وشك"

- الجهاز هو اللي بيقول كده

بصيت له بنظرة تفحص وقولتله

_ماشي، يعني هتمسح البنات اللي عندك؟!

- اه

"كداب في أصل وشك"

- ومش هعرف أي بنت تاني

"كداب في أصل وشك"

_ده ناقص يقولك كداب يا حسن!!، حسن!؟، هتمسح البنات ولا لأاا!!؟

- اه والله!

"كداب في أصل وشك"

- ما حد يسكت البتاع ده يا جماعة!!

"كداب في أصل وشك"

حسن تجاهل غلاسة الجهاز وقالي

- اوعديني إنك مش هتفتشي في تليفوني تاني!

_اوعدك

"كدابة في أصل وشك"

_عند اللزوم بس

"كدابة في أصل وشك"

_وقت ما تجيلك رسالة بس

"كدابة في أصل وشك"

_بقولك ايه، ارجع خوني، وأنا هرجع أفتش، والجهاز ده هرجعه لصاحبتي منال

- منال هي اللي عاملة كل ده؟!، اه هي عمايل منال دي، طول عمري مش بطيقها!

"كداب في أصل وشك"

- يعني ساعات كنت بستلطفها!

"كداب في أصل وشك"

- خونتك معاها مرة

_حتى منال؟!، وخونتني مع مين تاني؟!

- هي ايمي ومنال بس!

"كداب في أصل وشك"

- احم!، ومع عزة جارتنا

_ايه؟!

- ومدام رباب اللي في التالت، بس كانت مكالمات بس

"كداب في أصل وشك"

- وبنت خالتك سامية، وعمتها سعاد!، بس كده

"كداب في أصل وشك"

- ايه أنا من كترهم مش فاكرهم، خلاص، دول اللي افتكرتهم دلوقتي، لما افتكر تاني هقولك يا داليا! مسامحاني؟

_مادام اعترفت ومش هتخوني تاني، مسامحاك

"كدابة في أصل وشك"

- احم!، عاملة لينا ايه ع الغدا؟!

_صينية بطاطس باللحمة المفرومة

"كدابة في أصل وشك"

- أنتِ عبيطة هو أحنا بنجيب لحمة أصلاً؟!، احنا نباتيين!

_قولت اجس النبض مع الجهاز، عموماً أنا عاملة كشري

- خلاص يللا ناكل؟

_يللا

"كدابة في أصل وشك"

- بس ياله!!

#سكريبتيكوا

#روان_أبو_زيد