خالتك شاهيناز!

سكريبت كوميدي

- هو أنت؟!

- أستنى بالله عليك أفتحلي وحياة خالتك شاهيناز

= والله لو حلفتني بـ محمود أبنها ما هفتحلك

- طب هدخل أبص بصة وماشي

= هتدخل مش هتطلع، أنت حر!

- ايه الظلم ده!؟، يعني أنا في الهم مدعية وفي الفرح منسية!!؟

= بقولك ايه؟! جو في الهم مدعية وفي الصيف ملوخية والكلام ده، قوله عند أمك، هي السبب في كل ده أصلاً!

- يابني أختك دي تبقى مراتي!

= دلوقتي بقت مراتك؟!، أومال مين اللي كنت بتقول عليها ملبوسة دي؟!

- خالتك شاهيناز!

= بقولك ايه ملكش دعوة بخالتي شاهيناز نهائي، أهي أحسن منك وسألت على شاهندة مراتك قبل منك أنت شخصياً

- طب هشوف الشيخ بيعالجها إزاي وهخرج على طول

= أنت حر، هي جوه قاعدة تعض في الستاير وتقول هاتولي مجدي هاتولي مجدي، زي البت الملبوسة بتاعة ريهام سعيد! هتدخل؟

- أنا هدخل أشوفها، أنا جايلها بنفسي، يا شاهندة أنا جيت!!

سمع صوت زئير من جوه:

- بسم الله الرحمن الرحيم، ايه ده يا شاهندة أنتِ بقيتِ بتشربِ معسل ولا ايه؟!

= شوفت بقى أنت حر!

- يعني خلاص مش هقدر أشوفها؟

= أنت للدرجة دي هتتجنن يا مجدي عشان ماشوفتهاش؟

- أكتر من ما تتخيل يا شادي، وحياة خالتك شاهيناز همـ ـوت وأشوفها

= بقولك ايه ملكش دعوة بخالتي لآخر مرة أنا بحذرك!

- طب بص عشان في وعد وعدتهولها، وكدة مش هعرف أنفذه، نفذه أنت بما إنك مش عايز تدخلني! .. أول ما تشوفها!

= أه

- تف عليها

= نعم؟!

- وقولها: امك وخالتك شاهيناز!.

#سكريبتيكوا

#روان_أبو_زيد